ସାବିତ୍ରୀ

ଆଜି ଜ୍ୟେଷ୍ଠ ମାସ ଅମାବାସ୍ୟା ତିଥି

ପବିତ୍ର ସାବିତ୍ରୀ ବ୍ରତ

ଭକତି ବିଶ୍ୱାସେ ପତିବ୍ରତା ନାରୀ

ପାଳିଥାନ୍ତି ଏକନିଷ୍ଠ ।

ସାରି ସ୍ନାନ ଶୈ।ଚ୍ଚ ରହି ଉପବାସ

ଆୟୋଜନ୍ତି ପୂଜାବିଧି

ମାତା ସାବିତ୍ରୀଙ୍କୁ କରନ୍ତି ସ୍ମରଣ

ନୂଆ ବସ୍ତ୍ର ଶଙ୍ଖା ପିନ୍ଧି ।

ଜାଳି ଅର୍ଘ୍ୟ ଦୀପ ଷୋଡଶୋପଚାରେ

ଦେବୀ ପୂଜା ଆରାଧନା

ଅରପନ୍ତି ନବ ଫଳପୁଷ୍ପ ଭୋଗ

ଶୁଣନ୍ତି ବ୍ରତ ମହିମା ।

ନିର୍ବାସନେ ବନେ କାଟୁଥିଲେ ଦିନ

ରାଜନ ଦ୍ୟୁମନ୍ତସେନ

ଅନ୍ଧ ପିତାଙ୍କର ନେଉଥିଲେ ଯତ୍ନ

ସୁପୁତ୍ର ଶ୍ରୀ ସତ୍ୟବାନ ।

ମଦ୍ର ଦେଶ ନୃପ ବୀର ଅଶ୍ୱପତି

ଅଲୀଅଳି ରାଜଜେମା

ବରିଲେ ସାବିତ୍ରୀ ନିସ୍ୱ ସତ୍ୟବାନେ

ଏକମନେ ପତିପ୍ରାଣା ।

କାଷ୍ଠ କାଟୁକାଟୁ ବୁଲାଇଲା ମୁଣ୍ଡ

ଗଛରୁ ପଡିଲେ ଖସି

ସତ୍ୟବାନଙ୍କର ଜୀବନ ନେବାକୁ

ଯମ ପହଞ୍ଚିଲେ ଆସି ।

ସାବିତ୍ରୀ ଦେବୀଙ୍କ ଭକ୍ତି ପରାକାଷ୍ଠା

କୁଚ୍ଛ୍ରବ୍ରତ ସାଧନାରେ

ଯାଚି ଦେଲେ ବର ସ୍ୱୟଂ ଯମରାଜ

ଲିଖିତ କଥାଶୃତିରେ ।

ନାରୀ ନାରାୟଣୀ ହେଉ ସୁକଲ୍ୟାଣୀ

ପତିପ୍ରାଣା ସୂଚିବ୍ରତା

ପାଳୁ ସ୍ୱକୁଟୁମ୍ବ ସେବା ପୁଣ୍ୟ ବ୍ରତ

ପୁତ୍ରକନ୍ୟା ମାତାପିତା ।

ଆଜ ଶୁଭ ଦିନେ ପବିତ୍ର ସତୀତ୍ୱ

ହେଉ ପ୍ରାଣେ ଉଜାଗର

ମାତା ମହିୟସୀ ସାବିତ୍ରୀ ସ୍ମରଣେ

ଶକ୍ତି ହେଉ ଶୁଭଙ୍କର ।