ସ୍ୱପ୍ନ ଦେଶ ରାଜକୁମାର

ଉଦବିଗ୍ନ ଆଜି ପ୍ରାଣ ମନ ଛନଛନ

ରୋମାଞ୍ଚିତ ହୁଏ ତନୁ ଘନଘନ

ସପନେ ଦେଖିଣ ନବ ରୂପକାନ୍ତି ତରୁଣ

ଆଖି ଦୋଟି ଝଲମଲ ଭରା ଯୌବନ ।

ଯୌବନ ଜଉଘରେ କାମଶର ନିକ୍ଷେପି

ଭାବାନ୍ତର ହୋଇ ଉଠେ ମମ ଚିତ୍ତ ଛବି

ଅବ୍ୟକ୍ତ ବିଷାଦେ ମନ ହୁଏ ଘାରି

ଚାଞ୍ଚଲ୍ୟତା ଖେଳି ଉଠେ ଦେହେ ଅମାପି ।

ନବ ବସନ୍ତର ନବ ମଳୟ ସ୍ପର୍ଶରେ

ଛୁଇଁ ଯାଏ ତନୁମନେ ପ୍ରଣୟ ଆମୋଦ ପ୍ରୀତି

ପ୍ରତ୍ୟୁଷ, ପ୍ରଦୋଷ ଅବା ଅପରାହ୍ନେ

କର୍ଣ୍ଣେ ଶୁଭିଯାଏ ଶ୍ୟାମ

ପ୍ରେମ ମଞ୍ଜୁ ମୁରଲୀ ଗୀତି ।

ଭଲ ଲାଗେନାହିଁ ଭଜନ ଜଣାଣ

ସାଙ୍ଗସାଥୀ ମେଳ ବାପଘର

ନିରତେ ଦିବସ ନିଶି ପ୍ରତିକ୍ଷଣ

ମନ ଖୋଜେ ତୁମକୁ,

ହେ ସ୍ୱପ୍ନ ଦେଶ ରାଜକୁମାର ।

ଦରଦୀ ଏ ଛାତି ତଳେ ଥିଲା ଖିଆଲୀ ମନ ଟିଏ

ଚୋରି କରିଦେଲା ତୁମ ଢଳଢଳ ଚାହାଣୀ

ସ୍ୱପନେ ଗୋପନେ ଦେଖି ତୁମ ରୂପଛବି

ହଜିଗଲା ନିଦ ମୋର

ଉନ୍ମନରେ ହୋଇଗଲି ତୁମ ରାଣୀ ।

ପ୍ରବାସ କି ସ୍ବଦେଶର ହେ ସ୍ୱପ୍ନ ଦେଶ କୁମାର

କାହାର ନନ୍ଦନ ତୁମେ

କେଉଁ ରାଜ୍ୟ ନବ ରାଜ କୁମାର ?

ଘର କରିଦେଲ ମୋ ମନ ନବରରେ

ନିଭୃତେ ନିମିଷେ ସମ୍ପିଲି ଖିଳ ତନୁକୁ

ଶୀହରିତ ଗୁଞ୍ଜରିତ ହେଲା ମନ ତପୋବନ

ତଵ କର ସ୍ପର୍ଶେ ଭୁଲିଲି ମୋ ନିଜକୁ ।

ରାତ୍ର ଶେଷେ ପାହାନ୍ତିରେ ନିଦ ଗଲା ଭାଙ୍ଗି

ସ୍ୱପ୍ନରେ ହେଲ ତୁମେ ଲୁପ୍ତ

ଭାଳିଭାଳି ସ୍ୱପ୍ନର ପ୍ରତି ପ୍ରହରକୁ

ଦେହ ମନ ମୋର ଦଗ୍ଧ ଜାଗ୍ରତ ।

କାହିଁ ଚାଲିଗଲ ସ୍ୱପ୍ନ ଦେଶ ରାଜକୁମାର

ପ୍ରଣୟ ପୀୟୁଷେ ଲଗାଇ ବିରହ ବିଷମବିଷ

କ୍ଷଣେ କ୍ଷଣେ ଖୋଜିଖୋଜି ଚିତ୍ତ ପ୍ରାଣ ଉଲ୍ଲସିତ

ଆରାଧନା କରେ ତୁମ ଚରଣରେ,

ଭାବି ମୁଁ ତୁମକୁ ପରାଣ କାନ୍ତ ।