Library
Profile
ରକ୍ଷାର ବନ୍ଧନ
ରକ୍ଷାର ବନ୍ଧନ
ଭାଇ ତୋର ହାତେ ବାନ୍ଧିଲି ମୁଁ ରାକ୍ଷୀ
ରଖିବୁ ତୁ ମୋର ମାନ
ଗେହ୍ଲା ଭାଇ ମୋର ଅତି ଆପଣାର
ଦେଲି ତୋତେ ମୋ ରାଣ ।
ରାକ୍ଷୀ ନୁହେଁ ଏକ ରେଶମର ଡ଼ୋରୀ
ରକ୍ଷାସୂତ୍ର ଅଟେ ଏହି
ଭାଇ ଭଉଣୀର ସେନେହ ସମ୍ପର୍କ
ଜଗତକୁ ଦିଏ କହି ।
ମର୍ତ୍ତ୍ୟ ଭୁବନରେ ପବିତ୍ର ସମ୍ପର୍କ
ଭାଇ ସାଥେ ଭଉଣୀର
ସବୁ ଦୁଃଖ ଫେଡ଼ି ଭଉଣୀ ଜୀବନୁ
ଭାଇ ଦିଏ ଉପହାର ।
ତମସା ବିନାଶି ଭରିଦିଏ ଖୁସି
ପ୍ରଶାନ୍ତ ରୂପ ବିଶ୍ଵାସେ
ଭଉଣୀ ଜୀବନୁ ଦୁଃଖ ହୁଏ ଦୂର
ଭାଇର ସୁକ୍ଷ୍ମ ନିର୍ଦ୍ଦେଶେ ।
r>
କୁସୁମ ବିକାଶେ ଆସଇ ମଳୟ
ଆଣଇ ସୁଖର ଧାରା
ରାକ୍ଷୀର ଡ଼ୋରୀରେ ବାନ୍ଧଇ ଜୀବନ
ବୁଣି ସେନେହ ପସରା ।
କୃଷ୍ଣଙ୍କ ହାତରେ କୃଷ୍ଣା ବାନ୍ଧି ରାକ୍ଷୀ
ରଖିଥିଲେ ତାଙ୍କ ମାନ
କୁରୁସଭା ତଳେ କୋଟି ବସ୍ତ୍ର ଦେଇ
କୃଷ୍ଣ ଦେଲେ ପ୍ରତିଦାନ ।
ସେହିପରି ପ୍ରତି ଭାଇ ହୃଦୟରେ
ଥାଏ ଭଉଣୀର ସ୍ଥାନ
ରାକ୍ଷୀର ସୂତ୍ରରେ ବାନ୍ଧି ହୋଇ ଭାଇ
ଦିଏ ରକ୍ଷାର ବଚନ ।
ଡ଼ୋରୀ ନୁହେଁ ଏ ଯେ ମମତା ବନ୍ଧନ
ଚିହ୍ନ ଆମ ସଂପର୍କର
ପ୍ରୀତି ସ୍ପନ୍ଦନରେ ଝରାଇ ପୀୟୁଷ
ଝରାଏ ଆନନ୍ଦ ଝର ।
