ରଜ ହେଉନାହିଁ ସଜ

ବନସ୍ତରେ ଆଉ ଡାକୁନି ଗଜ

ଗଜ ପାଇଁ ପରା ମଣିଷ ଖଞ୍ଜ ।

ଦୁଇ ବର୍ଷ ହେଲା ଆସୁଛି ରଜ

ହେଲେ ରଜ ପାଇଁ ନାହିଁ ମଉଜ ।

ସାତ ସପନ ତ ହେଇଛି ରଜ

ସାବିତ୍ରୀ ସାଂଗକୁ ପରବ ରଜ ।

ସବୁ ମହାମାରୀ ଦେଇଛି ଚାଟି

ଗୃହବନ୍ଦୀ ଏବେ ରଜ ପାଇଟି ।

କେବେ ସେ ପହିଲି କେବେ ସଂକ୍ରାନ୍ତୀ

ତିଥି ବାର ସବୁ ହୋଇଛି ଇତି ।

ତୋଟା ମେଳସବୁ ହୋଇଛି ମନା

ଦୋଳି ଖେଳିବାକୁ ସାଥି ଡାକନା ।

ଲକଡାଉନ୍ ପୁଣି କରୁଛି ଚାଷ

ମିଳୁନି ଆମ୍ବଟେ ପୁଣି ପଣସ ।

ଗାଆଁରୁ ସହର ହୋଇଛି ଏକା

ରଜ ପରବଟା ପଡିଛି ଫିକା ।

ବାଗୁଡି ପୁଚିରେ ହୋଇଲେ ସାଙ୍ଗ

ସାଥି ମେଳ ଦେଖି କରୋନା ରାଗ ।

ଛକି ଶୂନ ସବୁ ରାସ୍ତା ଘାଟରେ

ଶହେଆଠ ରାବ ଶୁଭେ ଦୂରରେ ।

ମାଆ କୋଳୁ ପୁଅ ଯାଉଛି ଚାଲି

କି ରଜ ପାଳିବୁ କହ ବଗୁଲୀ ।

ହାଣ୍ଡି ଧୋଇବ ନା ହାଣ୍ଡି ଛାଡିବ

ମହାମାରୀ ପୁଣି ଦେଉଛି ରାବ ।

ନାହିଁ ପୋଡ ପିଠା ନାହିଁ ଅଳତା

ରଜ ପିନ୍ଧୁଅଛି ଶ୍ମଶାନ ଚିତା ।

ରଜସ୍ବଳା ସିନା ହୁଏ ଧରଣୀ

କରୋନା ପାଇଁ ସେ ଆଜି ବାୟାଣୀ ।

କୁଆଁରୀଟେ ଆଉ କରୁନି ମନ

ହେବ ରଜ ସଜ ଏ ତିନି ଦିନ ।

ଜୀବନ ସାଂଗରେ ଜୀବିକା ମାଡ

କି ରଜ ପାଳିବ ଭାଙ୍ଗିଛି ହାଡ ।

ଗଣ ପର୍ବ ଏବେ ଗଣୁଛି ବସି

କେତେ ଖସୁଛନ୍ତି ଚାଳିଶି ଅଶି ।

ରଜ ଏବେ ଆଉ ହେଉନି ସଜ

ଘରେ ଘରେ ଏବେ କରୋନା ବୋଝ ।

ସାରା ରାଇଜରେ ପଡିଛି ଡକା

ରଜ ସଜ ଏବେ ପଡିଛି ଫିକା ।