କେମିତି ଆସିଛୁ ମାଆ

କେଉଁଠି ଲାଗିଛି ନାଇଟ୍ କର୍ଫ୍ଯୁ

   କେଉଁଠି ଶହେ ଚୌରାଳିଶି

କେମିତି ଆସିଛ କୁହ ଦୟାମୟୀ

   ନାହିଁ କା'ମନରେ ଖୁସି ।

କେଉଁଠି ବେଢିଛି କଣ୍ଟେନମେଣ୍ଟ୍

   କେଉଁଠି ସର୍ଭେଲାନ୍ସ

ଦଶ'ରା ପସରା ସବୁତ ବେସୁରା

   ଚାରିଆଡେ ସାଇଲେନ୍ସ ।

ପଡିଛି ପରଦା ତୋ ନେତ୍ରରେ ସଦା

    ସୂରୁଯ ପାରୁନି ଦେଖି

ମୁଁ ଛାର ମାନବ ପାରିବି କି ତବ

   ଶ୍ରୀଚରଣେ ମଥା ରଖି ।

ମାଆ କାତ୍ଯାୟନୀ କଳୁଷ ନାଶିନୀ

   ଶକ୍ତି ରୂପେଣୀ ଦୁର୍ଗା

ଆସିଅଛୁ ମାଆ ଏ ଧରା ଧାମକୁ

   କି ବର୍ଣିବି ମୁଁ ଅଭାଗା ।

ଶୁଭୁନାହିଁ ଭେରୀ ଶୁଭୁନାହିଁ ତୂରୀ

   ଶୁଭୁନି ଓଁ କାର ଧ୍ବନି

ନୀରବ ନିଃଶ୍ଚଳ ଏ ଶରତ କାଳ

   ଗ୍ରାସିଛି କି ରାହୁ ଶନି ? 

ଶରତ ଆକାଶେ ଶାରଦୀୟ ଜହ୍ନ

    ନାହିଁ ତା ଓଠରେ ହସ

ସ୍ନିଗ୍ଧ ଶୀତଳ ସମୀର ପରଶେ

    କେ' ଭରିଦେଇଛି ଶ୍ଳେଷ ?

ନାହିଁ ଘଣ୍ଟ ଘଣ୍ଟା ନାହିଁ ହୁଳୁହୁଳି

    ନାହିଁ ଭୋଗ ରାଗ ସଜା

ନାହିଁ ଧୂପ ଦୀପ ଚନ୍ଦନ ପ୍ରଲେପ

   ନାହିଁ ବାଣ ନାହିଁ ବାଜା ।

ଗଜ ବାହାନେ କି ନାଆ ବାହାନରେ

    ହୋଇଛୁ କି ଉପବୀତ

ଅଶାନ୍ତ ଧରଣୀ ଶାନ୍ତ କରିଦେଏ

    ଢାଙ୍କି ତୋ ସ୍ନେହ ପଣତ ।

ତୋ ମହା ଅଷ୍ଟମୀ ତୋ ମହା ନବମୀ

    ତୋ ମହା ଦଶମୀ ତିଥି

ମହାମାରୀ ମହା କୋପେ ବିଜନିତ

   ଶୂନ୍ଯ ତୋ ମଣ୍ଡପ ଆଦି ।

ତୋ ଜନନୀ କୋଳ ଲାଗେ କୋଳାହଳ

    ଭକତିର ଜନ ମନ

ସେ ଭକ୍ତି ମଝିରେ ମହାମାରୀ ଶକ୍ତି

    ହୋଇଛି ଦଣ୍ଡାୟମାନ ।

ସିଂହ ବାହିନୀ ଦୁର୍ଗତୀ ନାଶିନୀ

   କାମ୍ପିଲ୍ଯ ବାସିନୀ ମାଆ

ବିରାଜିତ ହୁଅ ପରାହତ କର

   ବ୍ଯାଧି ମହାମାରୀ କାୟା ।