ରାଜା ପାଇଲେ ସଜା
ରାଜା ପାଇଲେ ସଜା
ରାଜ ଦରବାରେ ଉପସ୍ଥିତ ରାଜା
ରାଜ ପାରିଷଦ ମେଳେ
ବିଦୁଷକେ ଚାହିଁ କହନ୍ତି ରାଜନ
ଥଟ୍ଟା ପରିହାସ ଛଳେ ।
ସ୍ଵପନ ଦେଖିଲି ମୃଗୟା ବିନୋଦେ
ଯାଇଛି ଘଞ୍ଚ ଅରଣ୍ୟ
ପାତ୍ର ମନ୍ତ୍ରୀ ସହ ତୁମେ ବିଦୁଷକ
ମୋ ସାଥେ ଗମିଛ ବଣ ।
ଝଡ ତୋଫାନରେ କିଏ କେଉଁ ସ୍ଥାନେ
ନ'ମିଳିଲା କା'ର ପତ୍ତା
ଏକା ତୁମେ ଅଛ ମୋର ଅନୁଗାମୀ
ଯେବେ ନାହିଁ ଝଡ ସତ୍ତା ।
ଅନ୍ଧାର ରାତିରେ ଆମେ ଦୁଇ ଜଣ
ଆଗକୁ ଯାଇଛୁ ମାଡି
ଜଙ୍ଗଲ ମଧ୍ୟରେ ପୃଥକ କୁଣ୍ଡରେ
ମୁହଁ ମାଡି ଗଲୁ ପଡି ।
ପହଞ୍ଚିଲେ ସୈନ୍ୟ ମାତ୍ର କିଛି କ୍ଷଣେ
ମସାଲ ଧରି ହସ୍ତର
ମଧୁ କୁଣ୍ଡ ମଧ୍ୟେ ପଡିଅଛି ମୁହିଁ
ବିଷ୍ଠାରେ ତୁମ ଶରୀର ।
ହଠାତ୍ ମୋହର ନିଦ ଭାଜିଯାଏ
ବୁଝିଲି ଏଥିଲା ସ୍ଵପ୍ନ
ଆସନରୁ ଉଠି କହେ ବିଦୁଷକ
ତହୁଁ ମୋତେ ଦୃଶ୍ୟମାନ ।
ବହୁ କଷ୍ଟେ ଆମେ ଉଠିଲୁ କୁଣ୍ଡରୁ
କେମିତି ହୋଇବୁ ସଫା
ଉପାୟଟି ଯେବେ କହିଲି ଆଜ୍ଞାଙ୍କୁ
ଚିନ୍ତା ହେଲା ଦଫାରଫା ।
ଜିହ୍ଵାରେ ଚାଟିଲେ ଆପଣ ମୋ ଦେହ
ମୁଁ ଚାଟିଲି ପ୍ରଭୁଙ୍କର
ଏମିତି ଭାବରେ ଚାଟି ଚୁଟି ହେଲୁ
ଆମେ ଦୁହେଁ ପରିଷ୍କାର ।
ଲଜ୍ଜିତ ରାଜନ ଭାରି ସଭା ମଧ୍ୟେ
ଶୁଣି ବିଦୁଷକ ବାଣୀ
ବୁଝିଲେ ଅନ୍ୟକୁ କାଦୁଅ ଫିଙ୍ଗିଲି
ହୋଇଲା ଇଜ୍ଜତ ହାନୀ ।