ଅଧା ଲଙ୍ଗୁଳୀ
ଅଧା ଲଙ୍ଗୁଳୀ
ନାତି କହେ ଜେଜେ ଖଣ୍ଡଗିରି ଠାରେ
ପଡିଛି ସର୍କସ ଖେଳ ,
ଚାଲ ଆମେ ଯିବା ଆଖିରେ ଦେଖିବା
ଜୋକରଙ୍କ ହାସ୍ୟ ରୋଳ ।
ଜେଜେ-ଦୁଇଦିନ ହେଲା କମର ଧରିଛି
ସଳଖି ପାରୁନି ଅଣ୍ଟା ,
ସିଧା ଠିଆ ହେବା କଷ୍ଟ ଦିଏ ଭାରି
ନିରର୍ଥକ ସବୁ ଚେଷ୍ଟା ।
ନାତି- ଯାଇଥିଲେ ଜେଜେ ଦେଖିଥାନ୍ତ ହାତୀ
କରୁଛି ଗଣେଶ ପୂଜା ,
ଘୋଡା ବାଘ ଭାଲୁ କୁକୁର ନେଉଳ
କରୁଛନ୍ତି କେତେ ମଜା ।
ଜେଜେ-କି'ମଜା ଦେଖିବି ଆଣ୍ଠୁରେ ଯନ୍ତ୍ରଣା
ବସିବା ନୁହେଁ ସମ୍ଭବ ,
ଚାଲି ଚାଲି ଯାଇ ସର୍କସ ଦେଖିବା
ମୋ ପାଇଁ ଯେ ଅସମ୍ଭବ ।
ନାତି- ଜାଣିଛ'ନାଁ ଜେଜେ ସର୍କସରେ କାଳେ
ଝିଅ ଖେଳୁଛନ୍ତି ଦୋଳି,
ସୁନ୍ଦରୀ ଯୁବତୀ ରଶିରେ ଚାଲନ୍ତି
ସେ ପୁଣି ଅଧା ଲଙ୍ଗୁଳୀ ।
ଜେଜେ-ଭାରି ଜିଦିଆ ତୁ ନ'ଗଲେ ସାଥିରେ
ଯିବୁନି ସର୍କସ ଏକା ,
ତୋ ଖୁସି ପାଇଁ ମୁଁ କଷ୍ଟେ ମଷ୍ଟେ ଯିବି
ଥାଉ ପଛେ ଅଣ୍ଟା ରକ୍କା ।