Library
Profile
ପୁରାଣ ଯୁଗରୁ ସେ ଅପରାଜିତା
ପୁରାଣ ଯୁଗରୁ ସେ ଅପରାଜିତା
ମୋହିନୀ ବେଶରେ ମନ ମୋହି ବିଷ୍ଣୁ
ପରଷି ଥିଲେ ଅମୃତ
ଦେବ ଦୈତ୍ୟ କଳି ହେଲା ସମାଧାନ
ପରିବେଶ ହେଲା ଶାନ୍ତ
ବର ପ୍ରାପ୍ତି ପରେ ସବୁ ଦୈତ୍ୟ ଗଣ
ପ୍ରାୟ ଉତ୍ପାତ ସ୍ଵର୍ଗରେ
ଥର ହର ଦେବଗଣ ଗୁହାରି କରନ୍ତି
ଯାଇ ବିଷ୍ଣୁ ନିକଟରେ
ପ୍ରତି ଥର ଦେବୀଙ୍କର ସହାୟତା
ପ୍ରାପ୍ତ ଭିନ୍ନ ଭିନ୍ନ ରୂପେ
ସ୍ଵର୍ଗ ପୁର ରକ୍ଷା ପାଇଁ ଦୈବୀ ଶକ୍ତି
ସଦା ପ୍ରୟୋଗ ହୋଇଛି
କେବେ ଦୁର୍ଗା କେବେ କାଳୀ କାତ୍ୟାୟନୀ
ଦୈବୀ ଶକ୍ତି ନାରୀ ରୂପା
ଦେବ ଗଣ ଶକ୍ତି ହୀନ ଆଶା ଶୁନ୍ୟ
ପରେ ଦେବୀଙ୍କର କୃପା
ନାରୀକୁ ଲୋଲୁପ ଦୃଷ୍ଟିରେ ଦେଖିଲା
ଲଙ୍କାର ଜ୍ଞାନୀ ରାବଣ
ନାରୀ ହରଣ ଜନିତ ଅପକର୍ମ
ଅଚିରେ ହେଲା ନିଧନ
ଭଉଣୀକୁ କାରାଗାରେ ନିର୍ଯାତନା
କଷ୍ଟ ଦେଇ ପାପୀ କଂସ
ଭଉଣୀ ଗର୍ଭର ଅଷ୍ଟମ ସନ୍ତାନ
ଦେଖୁ ଦେଖୁ ହେଲା ଧ୍ଵଂସ
ରାଜ ଦରବାର ସ୍ଥଳେ ବିବସନା
ଏକ ନିର୍ଦ୍ଦୋଷ ନାରୀର
କୁରୁ ରାଜ ବଂଶ ଧ୍ଵଂସ ପ୍ରାପ୍ତ ହେଲା
ଧ୍ଵଂସ ହେଲା ପରିବାର
ଠାକୁର ଦି' ଭାଇ ନିନ୍ଦିଲେ ନାରୀକୁ
ଲକ୍ଷ୍ମୀ ଛାଡ଼ି ଲକ୍ଷ୍ମୀ ଛଡ଼ା
ଅନ୍ନ ମୁଠେ ମିଳିଲାନି ଖାଇବାକୁ
ହାତେ ନ ଶିଝିଲା ଖଡା
ନାରୀକୁ ସମ୍ମାନ ସହ ମିଠା କଥା
କହିଲେ କୃଷ୍ଣ ନାଗର
ରାଧା ପ୍ରେମ ଉବୁ ଟୁବୁ ହେବା କଥା
ଜାଣି ଗଲା ଗୋପ ପୁର
ରାଧା ପ୍ରେମ ଅପରାଜିତା ରୂପରେ
ଅଛି ଯୁଗ ଯୁଗ ଧରି
ରାଧା ନାମ ଯୋଡ଼ି ହେଲା କୃଷ୍ଣ
ସହ
ରାଧାକୃଷ୍ଣ ସର୍ବୋପରି
ନାରୀ କୁ ସମ୍ମାନ ସହିତ ମର୍ଯ୍ୟାଦା
ପ୍ରାପତ ହୁଏ ଯେଉଁଠି
ନିଜ ବହୁ ମୁଖି ପ୍ରତିଭା ବଳରେ
ଅପରାଜିତା ସେଇଠି
ଘର ହେଉ ଅବା ବିକଶିତ ଦେଶ
ନାରୀ ହୋଇଲେ ପୂଜିତା
ନିଜର ପ୍ରଗତି ଦେଶର ଉନ୍ନତି
ହେବ ସେ ଅପରାଜିତା
ମା' କନ୍ୟା ଭଗ୍ନୀ ଓ ପତ୍ନୀ ଭୂମିକାରେ
ଦାୟିତ୍ଵ ତୁଲାଇ ନାରୀ
ମଥାରେ ପିନ୍ଧିଛି ବିଜୟ ର ଟୀକା
ଅପରାଜିତା ସେପରି
ଶିକ୍ଷା ଓ ସଂସ୍କାର ମାର୍ଜିତ ହୋଇଛି
ଆଧୁନିକ ସମାଜରେ
ଘର କାମ ଠାରୁ ଯୁଦ୍ଧ କ୍ଷେତ୍ର ଯାଏଁ
ନାରୀ ସହଯୋଗ କରେ
ଶିକ୍ଷା ସ୍ବାସ୍ଥ୍ୟ କ୍ରୀଡା ଶାସନ ବିଜ୍ଞାନ
ଅବା ଯୁଦ୍ଧ ପ୍ରାଙ୍ଗଣରେ
ଆଗ୍ରହ ସହିତ ନୈପୁଣ୍ୟ ପ୍ରାପତି
ନାରୀ ଲଭୁଚ୍ଛି ଅଚିରେ
ନାରୀ ପକ୍ଷେ ମହାକାଶ ଗବେଷଣା
ନୁହଇ ଅପରିଚିତ
ଦେଶର ପ୍ରଥମ ନାଗରିକ ପଦେ
ହୋଇଅଛି ପ୍ରତିଷ୍ଠିତ
ଶକ୍ତି ଜ୍ଞାନ ଆଉ ସହନଶୀଳତା
ବହୁମୁଖି ଅବଦାନ
ଅପରାଜିତା ସ୍ବଭାବ ଆଢ଼ୁଆଳେ
ନାରୀର ସହିବା ଗୁଣ
ନାରୀ ନୁହେଁ ମାତ୍ର ଉପଭୋଗ୍ୟ ବସ୍ତୁ
ଘର ଓ ଦେଶ ଇଜ୍ଜତ
ସମ୍ମାନ ର ସହ ପୁରୁଷ ମେଳରେ
ରହିଲେ ବଢ଼େ ମହତ
ପୁରୁଷ ମହିଳା ଉଭୟେ ସମାନ
ଉଲ୍ଲେଖ ସମ୍ବିଧାନରେ
ମହିଳା ଦିବସ ପାଳନ ହେଉଛି
ମାର୍ଚ୍ଚ ଆଠ ତାରିଖରେ
ସହଯୋଗ ହାତ ରହୁ ସଭିଙ୍କର
ନାରୀର ପ୍ରଗତି ପଥେ
ଅପରାଜିତା ର ପଦବୀ ଅକ୍ଷୁର୍ଣ୍ଣ
ସଦା ରହୁ ଦେଶ ହିତେ ।
