ଲାଇବ୍ରେରୀ
ପ୍ରୋଫାଇଲ୍
ପ୍ରତୀକ୍ଷିତ ରାତି
ପ୍ରତୀକ୍ଷିତ ରାତି
ରାତି ଆସେ ଲମ୍ବା ଲମ୍ବା
ପାହୁଣ୍ଡ ପକାଇ
ଆକାଶର ବିଶାଳ ଛାତିରେ
ହସୁଥାଏ ଜହ୍ନ
ତାରାମାନେ କରନ୍ତି ମିଟିମିଟି
ଏକାଜଣେ ଜାଗିଥାଏ
କାହାର ଅଫେରନ୍ତା ବାଟକୁ ଅନାଇ
ରାତିଆସେ ଲମ୍ବା ଲମ୍ବା
ପାହୁଣ୍ଡ ପକାଇ।
କଜ୍ଜ୍ବଳ ସଜ୍ଜଳ ଆଖି
ହୋଇଯାଏ ମୁଦି
ଓଷ୍ଠ ତା'ର ଥରୁଥାଏ
ନିଶଃବ୍ଦ ଶବ୍ଦରେ
ମନରେ ତା' ଅହେତୁକ ଡରର ଛାଇ
କେତେ ଅବା ରହିବ ଅନାଇ
ରାତି ଆସେ ଲମ୍ବା ଲମ୍ବା
ପାହୁଣ୍ଡ ପକାଇ।
ଚିହ୍ନା ଚିହ୍ନା ଲାଗେ ତାକୁ
ଝିଙ୍କାରିର ଶବ୍ଦ
ବେଙ୍ଗର କଟର କଟର
କରେ ଅସ୍ତବ୍ୟସ୍ତ
ରାତିର ନିସ୍ତବ୍ଧତା ତା'ର
ଏକାନ୍ତ ଆପଣାର
ପ୍ରତୀକ୍ଷା ପରେ ପ୍ରତୀକ୍ଷାର
ଯେପରି ନାହିଁ କେବେ ଅନ୍ତ
ତଥାପି ସେ ରହିଛି ଅନାଇ
ରାତି ଆସେ ଲମ୍ବା ଲମ୍ବା
ପାହୁଣ୍ଡ ପକାଇ।
ରାତିର ଆକାଶ ତଳ
ଲାଗେ ଫାଙ୍କା ଫାଙ୍କା
ଭାବେ ଜହ୍ନସାଥେ ହେବ
ଦୁଇପଦ କଥା
ହେଲେ ତାକୁ ଦୁଃଖ ଦିଏ
ଜହ୍ନର ନୀରବତା
ଗୁମ୍ ସୁମ୍ ଜହ୍ନ ଅବୁଝା ତା' ଭାଷା
ତଥାପି ସେ ହାରିବାକୁ ଚାହେଁନାହିଁ
ରାତି ଆସେ ଲମ୍ବା ଲମ୍ବା
ପାହୁଣ୍ଡ ପକାଇ।
ଘଣ୍ଟା ପରେ ଘଣ୍ଟା
ଯାଏ ବିତି
ଘଣ୍ଟାର ଟିକ୍ ଟିକ୍ ଶବ୍ଦ
ମାପୁଥାଏ ଛାତିର ଶବ୍ଦକୁ
ଆଖିଲୁହ ଗଡିଯାଏ
ଚିବୁକ ଦେଇ ଓଷ୍ଠର ପାଖକୁ
ଚୁପଚାପ ରାତି ଚାଲିଯାଏ
କିଛି ବି ନ କହି
ରାତି ଆସେ ଲମ୍ବା ଲମ୍ବା
ପାହୁଣ୍ଡ ପକାଇ।
