ପରମଶାସ୍ତ୍ର ଭାଗବତ
ପରମଶାସ୍ତ୍ର ଭାଗବତ
ହିନ୍ଦୁ ଧର୍ମଗ୍ରନ୍ଥ ଚତୁର୍ବେଦ ଅଟେ
ଈଶ୍ୱରୀୟ ବାଣୀ ବୋଲି ପ୍ରମାଣ
ବ୍ରାହ୍ମଜ୍ଞାନଠାରୁ ସୃଷ୍ଟିର ସମସ୍ତ
ନିଗୁଢ଼ ତତ୍ୱର ବଳିଷ୍ଠ ଜ୍ଞାନ |
ଭାଗବତ ଅଟେ ମାନବୀୟ କୃତ
ଶ୍ରେଷ୍ଠ ଧର୍ମଶାସ୍ତ୍ର ଭାବେ ବିଦିତ
ବୈଦିକ ଜ୍ଞାନର ରସାମୃତ ଭାବେ
ହିନ୍ଦୁ ଧର୍ମେ ହୁଏ ପରିଗଣିତ |
ମହାଋଷି ବ୍ୟାସ ସଂସ୍କୃତ ଭାଷାରେ
ରଚିଥିଲେ ଏହି ପରମ ଶାସ୍ତ୍ର
ସାରା ଭାରତରେ ଗ୍ରହଣୀୟ ହୁଏ
ବ୍ରହ୍ମଜ୍ଞାନ ଭାବେ ଯେ ଭାଗବତ |
ମୂଳ ଭାଗବତେ ଲିଖିତ ବିଷୟ
ଓଡ଼ିଆ ଭାଷାରେ ହେଲା ରଚିତ
ରଚିଥିଲେ ଯିଏ ଶ୍ରୀକ୍ଷତ୍ରରେ ରହି
ସେ ଅତିବଡ଼ି ଦାସ ଜଗନ୍ନାଥ |
କୃଷ୍ଣଙ୍କ ଚରିତ ସହ ବ୍ରହ୍ମଜ୍ଞାନେ
ପରିପୂର୍ଣ୍ଣ ସେହି ପରମ ଶାସ୍ତ୍ର
ପ୍ରତି ଓଡ଼ିଆର ହୃଦୟେ ଭକତି
ଆଙ୍କି ଆସୁଛି ସେ ଆଜି ପର୍ଯ୍ୟନ୍ତ |
ପ୍ରତି ଗ୍ରାମେ ଗ୍ରାମେ ଆଜି ବି ରହିଛି
ଭାଗବତ ଟୁଙ୍ଗି ପବିତ୍ର ସ୍ଥଳୀ
ନିତି ସନ୍ଧ୍ୟା ବେଳେ ପଢ଼ାଯାଏ ସେଠି
ଭାଗବତ ଗ୍ରନ୍ଥ ହୋଇ ମଣ୍ଡଳୀ |