ପ୍ରଖର ଖରାରେ ପଶୁ ଚରlଳି

ପ୍ରଚଣ୍ଡର ଗ୍ରୀଷ୍ମ ପ୍ରବାହ ଅମାପ

ସୃଜୁଛି ଦେହେ ଜ୍ୱଳନ

ଏହି ସମୟରେ ଗୃହେ ପଲ୍ଲୀ ପୁରେ

ଚନ୍ଦନ କରି ଲେପନ ।

ଅଙ୍ଗ ପ୍ରତ୍ୟଙ୍ଗକୁ ନିଦାଘ ତାପରୁ

ସୁଶିତଳ କରିଥାନ୍ତି

ଅତି କଷ୍ଟ ହୁଏ ଖଞ୍ଜା ବାତ ବହେ

ବାହାରେ ଅସହ୍ୟ ତାତି ।

ପଶୁ ପକ୍ଷୀ କୀଟ ପତଙ୍ଗ ମଣିଷ

ସର୍ବେ ଡହଳ ବିକଳ

ଦାରୁଣ ନିଦାଘ ଅସହ୍ୟ ତାପରେ

ଜାପୁଛନ୍ତି ଦୁଃଖ କାଳ ।

ନଦୀ ନାଳ ଆଉ ପୋଖରୀ ଇତ୍ୟାଦି

 ଶୁଖିଯାଇ କ୍ଷୀଣ ସ୍ରୋତ 

ଧାର ଧୀର ତର ହୋଇ ଚାଲେ ଏବେ

ନଦୀ ନାଳ ପ୍ରବାହିତ ।

ଅନେକ ସଂଖ୍ୟକ ବୃକ୍ଷ ହୁଏ ଶୁଷ୍କ

ଜଙ୍ଗଲ ନିଆଁ ଲଗଇ 

ଅସହ୍ୟ ତାପରେ ପ୍ରାଣ ଛଟ ପଟ

ସଭିଙ୍କ ଏବେ ହୁଅଇ ।

ପଶୁ ଚରାଳି ଏ ନେଇ ଥାନ୍ତି ବନେ

ପଶୁ ଚରାଇବା ପାଇଁ

ଉତପ୍ତ ମଧ୍ୟାହ୍ନ ସମୟରେ କ୍ଷୀଣ

ନଦୀ ନାଳ ପାଖେ ଯାଇ ।

ଆଶ୍ରୟ ନିଅନ୍ତି ମୁଣ୍ଡ ଫଟା ଖରା

ତାତି ବାଧା ଉପଶମ

ନିମନ୍ତେ ବିରାଟ ତରୁ ଟେ ତଳ ରେ

ଘେନି ଅଛନ୍ତି ବିଶ୍ରାମ ।

ଜଳଧାର ନିକଟରେ ଥିବା ହେତୁ

ଜଳୀୟ ବାଷ୍ପ ପ୍ରଭାବେ

ଝାଞ୍ଜି ଧାସ ତାପ ପ୍ରବାହ ଅମାପ

ଯନ୍ତ୍ରଣା ହ୍ରାସ ଲଭେ ।

ଘନ ପତ୍ର ଆଚ୍ଛାଦିତ ଆସ୍ତରଣ

ତଳରେ ଗ୍ରୀଷ୍ମ ପ୍ରବାହ

ହ୍ରାସ ପାଇଁ ଦାହ ଦଗ୍ଧ ଦ୍ୱିପ୍ରହ ରେ

ବିତାଇ ଥାନ୍ତି ସମୟ ।