ପ୍ରିୟାର ଆଖି

ଅଜଣା ଇଶାରେ ଅଦେଖା ଛବିରେ

    ଅଛି କେତେ ସୁପ୍ତ ଯାଦୁ

ତୁମ ସେ ଆଖିର ପ୍ରତିଟି ପଲକ

    ଲଙ୍ଘିପାରେ ସାତ ସିନ୍ଧୁ ।।

ପ୍ରୀତିର ପୁଲକେ ସ୍ମୃତିର ଝଲକେ

    ଅଧିର ଏ ମନ ଏତେ

କହିବିନି କେବେ ତୁମରି ନୟନେ

   ସପନ ଦେଖିଛି କେତେ ।।

ପ୍ରେମର ମହକ ଖେଳୁଛି ମନରେ

  ତୁମ ଆଖି ଧାରେ ଧାରେ

ଖୁସିର ଝରଣା ବହି ବହି ଗଲେ

  ଲାଜରେ କାହିଁ ମୁଁ ମରେ ।।

ଓଠ ଖୋଲି ଜମା କହି ପାର ନାହିଁ 

   ଆଖି ତୁମ କଥା କହେ

ଭାବନାରେ ସଦା ଚୁପି ଚୁପି ଆସି

   ମନକୁ ମଜେଇ ଦିଏ ।।

ତୁମ ପାଇଁ ମୋର ଲୁହର ଝରଣା

   ଆଖିରେ ଯାଉଛି ବହି

ସେଦିନକୁ ମୋର ରହିଛି ଅପେକ୍ଷା

  ମନ ଖୋଲି ଦେବ କହି ।।

ଜାଣିନି ମୁଁ ଅବା ଦେଖିନି ମୁଁ କେବେ

   ସପନେ ଆସୁଛ ନିତି

ହେଲେ ମୁଁ ପାଉନି କେଉଁଠି ଲୁଚିଛି

   ପ୍ରୀତି ବୋଳା ତୁମ ସ୍ମୃତି।।

ନୂଆ ଦୁନିଆରେ କରିଛ ଯେ ଘର

   ତୁମକୁ ସବୁ ତ ଜଣା

ନାଇଁ ରାଗ ରୁଷା ମାନ ଅଭିମାନ

   ପ୍ରେମର ତୁମେ ପାଉଣା ।।

ପ୍ରିୟାର ଆଖିରେ ଦୁନିଆ ଦେଖିବି

   ମନରେ ପାଞ୍ଚିଛି କେତେ

ସତ ମୋ ହୋଇବ ସପନ ରାଇଜ

   କାମନା ବିନାଶ ପଥେ ।।