ପରିବର୍ତ୍ତନ...
ପରିବର୍ତ୍ତନ...
ପରିବର୍ତ୍ତନ ଆସେ ଧରାରେ
ବିପ୍ଳବ ବିପତ୍ତି ଶେଷେ
ସନ୍ଧି ମୁହୁର୍ତ୍ତ ଚେତନା ସିକ୍ତ
ଘଡିର ସଂଯୋଗ ବଶେ।
ମନ ଭାବନା ଚିନ୍ତା ଚେତନା
ବଦଳି ବଦଳି ଯାଏ
ମାନବ ହୃଦେ ନୂତନ ଛନ୍ଦେ
ଆଶାର ସୁରୁଜ ଉଏଁ ।
ସମାଜ ନୀତି ବିକୃତ ରୀତି
ସୁଧୁରି ଯାଏ ମରତେ
ଜୀବନ ଗତି ପ୍ରେମ ପୀରତି
ରଙ୍ଗ ବଦଳାଏ କେତେ ।
ବିକାଶ ସୂର୍ଯ୍ୟ ପୂରୁବ ଦିଗେ
ଉଦୟ ହୁଏ ଦେଶେ
ସାମ୍ୟବାଦର ଡିଣ୍ଡିମ ବାଜେ
ଜୀବନବାଦ ହସେ ।
ସମୟ ଖେଳେ ଅଦ୍ଭୁତ ଖେଳ
ସ୍ଥାଣୁତା ହୁଏ ଶେଷ
ବଦଳି ଯାଏ ନୀତି ଆଦର୍ଶ
ଚଳଣି ଓ ପରିବେଶ ।
ସୁଖବି ଆସେ ଦୁଃଖ ବି ଆସେ
ବଦଳେ ତ ପରିସ୍ଥିତି
ରୋଗ ବି ଆସେ ଭୋଗ ବି ଆସେ
ମାନବ ଭୁଂଜଇ ନିତି।
କାଳର ବଳେ ସଂସାର ଚଳେ
ସଭିଏଁ କାଳ ଅଧିନ
ଜଗତନାଥ ଇଙ୍ଗିତ ସ୍ପର୍ଶ
ଆଣଇଁ ପରିବର୍ତ୍ତନ ।