ପରିବାର
ପରିବାର
ମଣିଷ ଜୀବନ ଦୁର୍ଲ୍ଲଭ ଅଟଇ
ପଢି ଲେଖି ବୁଝିପାରେ
ବୁଦ୍ଧି ବିବେକକୁ କାମରେ ଲଗାଇ
ସଂସାରକୁ ଗଢ଼ିପାରେ l
ଦେଶର ଏକକ ଅଟେ ପରିବାର
ପରିବାର ମିଶି ଗ୍ରାମ
ଗ୍ରାମ ମିଶିକରି ହୁଏ ପଂଚାୟତ
ପଂଚାୟତ ମିଶି ବ୍ଲକ l
ପରିବାର ଲୋକେ ପରସ୍ପର ମଧ୍ୟେ
ସ୍ନେହର ଡୋରରେ ଗୁନ୍ଥା
ମାନ ଅଭିମାନ ରହେନି ମନରେ
ବିଶ୍ୱାସେ ସମସ୍ତେ ବନ୍ଧା l
ଭାଇ ଭଉଣୀର ଖେଳ କୁଦ ନାଚେ
ଖୁସିରେ ଘରଟି ଉଛୁଳେ
ପରସ୍ପର ସ୍ନେହ ମମତା ପ୍ରେମରେ
ସ୍ୱର୍ଗର ଆନନ୍ଦ ମିଳେ l
ଲଘୁ ପରିବାରେ ଗୁରୁଜନ ଠାରୁ
କର୍ତ୍ତବ୍ୟ ବୋଧଟି ଶିଖେ
ବଡ଼ ହୋଇ ପୁଣି ସଭିଙ୍କୁ ସାଥିରେ
ମମତା ରଜୁରେ ରଖେ l
ବନ୍ଧୁ ପରିଜନ ପର୍ବରେ ମିଳନ
ପିଠା ପଣା ମିଠା ଭାସେ
ନାହିଁ ଦ୍ୱେଷ ଈର୍ଷା ସହାନୁଭୂତିରେ
ହସେ ଆନନ୍ଦ ଉଲ୍ଲାସେ l
ଦାଦା ବଡ଼ ବାପା ବାପାର ମଧ୍ୟରେ
ସଦଭାବନା ମଧୁର
ସର୍ବେ ଏକ ହୋଇ ଜଡିତ କର୍ମରେ
ଲାଗେ ଅପୂର୍ବ ସୁନ୍ଦର l
କୌଳିକ ବୃତ୍ତିକୁ ଆପଣା କରିକି
ଚଳେ ସବୁ ପରିବାର
ନାହିଁ ସ୍ୱାର୍ଥପର ପରଶ୍ରୀକାତର
ଗୁରୁତ୍ୱ ବୁଝେ ନିଜର l
ଶିଶୁ ବୃଦ୍ଧ ବ୍ୟକ୍ତି ସେବାରେ ସମସ୍ତେ
ନିଜକୁ ଉତ୍ସର୍ଗ କରେ
ପରିବାରେ ସର୍ବେ ଏକତ୍ବ ଭାବରେ
ମିଳିମିଶି କାମ କରେ l
ନାହିଁ ପର ଚିନ୍ତା ନିନ୍ଦା ଘୃଣା ଭାବ
ସାହାଯ୍ୟ କରେ ପରକୁ
ପରକୁ ଆପଣା କରିବାର କଥା
ପିଲା ଶିଖେ ପରିବାରୁ l
ଦେଶର ପ୍ରଗତି ରାଜ୍ୟର ଉନ୍ନତି
ପରିବାରେ ସଂଗଠିତ
ଅସୀମ ଶକତି ରହିଛି ପୂରିତ
ପରିବାରେ ଲୁକାୟୀତ l
କର୍ମରେ ଆଶ୍ରିତ ହେଲେ ସବୁ ବ୍ୟକ୍ତି
ଦେଶତ ଆଗେଇଯିବ
କର୍ମ ବିନା ନର ହୁଅଇ ଜଡ଼ତ
ଅନ୍ୟ ହାତ ଚାହୁଁଥିବ ।