ଅନୁଭବରେ ଦିବ୍ୟସତ୍ତା

ଷଡ଼ ରିପୁ ଜୟ ପବିତ୍ର ହୃଦୟ

ଭାବରେ ତନ୍ମୟ ଶୁଦ୍ଧ ଚେତା

ନିଜକୁ ଭୁଲଇ ଭକ୍ତି-ପ୍ରେମ ରସେ

ତା' ଅନୁଭବରେ ଦିବ୍ୟସତ୍ତା ।

ଦେହ ଅଭିମାନ ହୁଅଇ ବିଲୀନ

ମନୁ ଦୂର ସକଳ ଆବିଳତା

କେବଳ ଈଶ୍ବର ଚିନ୍ତା-ଚେତନାରେ

ବ୍ରହ୍ମ ରୂପେ ଦୃଶ୍ୟ ଏ ସୃଷ୍ଟିସତ୍ତା ।

ଯୋଗୀ ମୁନିଋଷି ଥା'ନ୍ତି ଅନୁଭବୀ

ଯୋଗ ଧ୍ୟାନ ବଳେ ଏ ଦିବ୍ୟସତ୍ତା

ଝରି ପଡ଼େ ସେଥୁ ଆଶୀର୍ବାଦ ରୂପୀ

ମୋକ୍ଷ ମାର୍ଗର ସକଳ ରସ୍ତା ।

ଷୋହଳ ସହସ୍ର ଗୋପର ଲଳନା

ଏ ଦିବ୍ୟସତ୍ତା ସଦା ଅନୁଭବୀ

ତରି ଯାଇଥିଲେ ଭବ ତରଙ୍ଗିଣୀ

ଭାବରେ ଶ୍ରୀକୃଷ୍ଣଙ୍କ ପଦସେବୀ ।

ବୋଧିସତ୍ୱ ଏହି ଦିବ୍ୟସତ୍ତା ପାଇଁ

ବୁଦ୍ଧତ୍ବ ପ୍ରାପ୍ତିରେ ଜାଳିଲେ ଦୀପ୍ତି

ଯାହାଙ୍କର ନିତି ଆଦର୍ଶେ ଚାଲିଲେ

ମାନବ ଜନ୍ମରୁ ମିଳିବ ମୁକ୍ତି ।