ପ୍ରେମର ଓଁକାର

ଶକ୍ତିସ୍ୱରୂପିଣୀ ପ୍ରକୃତି ରୂପିଣୀ

   ଭାବ ମୟୀ ତତ୍ତ୍ୱମୟୀ

ପ୍ରେମମୟୀ ରାଧା ବୃଷ ଭାନୁ ସୁତା

   ଶ୍ରୀକୃଷ୍ଣଙ୍କ ରାସମୟୀ ।

ପରମପ୍ରେମିକା କୃଷ୍ଣ ପ୍ରଣାଧିକା

  ପ୍ରୀତି ସ୍ୱରୂପିଣୀ ରାଧା

ପୂର୍ଣ୍ଣ ସମର୍ପିତା ଶ୍ରୀରଙ୍ଗା ଚରଣେ

   ଦୁଇ ଦେହ ଏକ ଆତ୍ମା ।

କମଳ ଲୋଚନି ଶ୍ୟାମ ଆହ୍ଲାଦିନୀ

  ମଧୁକୁଞ୍ଜର ଶ୍ରେଷ୍ଠ ନାୟିକା

ମୋହନ ବେଣୁର ପ୍ରଥମ ଝଙ୍କାର

  ମାନମୟୀ କାହ୍ନା ପ୍ରେମିକା ।

ଅଙ୍ଗେ ଅଙ୍ଗେ ତୁମ ଶ୍ୟାମ ନାମାବଳୀ

  ଅନ୍ତରେ ଗୋବିନ୍ଦ ପ୍ରୀତି

ପ୍ରେମ ଠାକୁରାଣୀ ମାଧବ ମୋହିନୀ

  କିଶୋରୀ ପ୍ରେମର କିର୍ତ୍ତୀ ।

ତୁମ ପ୍ରେମଧାରେ କହ୍ନେଇ ବୁଡ଼ିଲା

  ସଂସାରେ ହୋଇଲ ଧନ୍ୟ

ପରମ ପୁରୁଷ ହୋଇଲେ ଅଧୀର

  କରିଥିଲ କେଉଁ ପୁଣ୍ୟ ।

କୃଷ୍ଣ ନାମ ଆଗେ ତୁମନାମ ଆସେ

  ଭକତିର ପୁଜାରିଣୀ

ପ୍ରେମର ଓଁକାର କିର୍ତ୍ତୀକା ଦୁହିତା 

   କୃପାକର ରାଧାରାଣୀ ।