ପ୍ରେମ
ପ୍ରେମ
ନହୁଲି ବୟସ ମହୁଲି ନିଶାରେ
ପ୍ରେମ ଭରି ଦିଏ ପୁଲକ
ମନ ତଳେ ଝରେ ଖୁସିର ଝରଣା
ମୁହଁରେ ଚେନାଏ ଝଲକ ।
ଚଞ୍ଚଳ ହରିଣୀ ପରି ଦୁଇ ଆଖି
ଖୋଜୁଥାଏ ମନ ପ୍ରେମୀକୁ
ମିଳନର ଆଶା ମନେ ଜାଗିଉଠେ
ଆନମନା କରେ ମନକୁ ।
ମନ ଅଗଣାରେ ପ୍ରେମର ସଙ୍ଗୀତ
ସୁର ତାଳ ଦେଇ ଗାଆନ୍ତି
ଶୁଆ , ଶାରୀ ଭଳି ପ୍ରେମର ଭାଷାରେ
କେତେ ମିଠା କଥା କୁହନ୍ତି ।
ମନ ଉଡୁଥାଏ ନୀଳ ଆକାଶରେ
ଦେଖୁଥାଏ ନିତି ସପନ
ପ୍ରେମର ରଙ୍ଗଟା ଲାଗିଗଲେ ଦେହେ
ମାନେ ନାହିଁ ବାଧା ବନ୍ଧନ ।
ଇନ୍ଦ୍ରଧନୁ ରଙ୍ଗ ଭରିଯାଏ ମନେ
ନିର୍ମଳ ମନର ଆକାଶ
ସ୍ବପ୍ନର ସହର କଳ୍ପନାରେ ଆଙ୍କି
କରଇ ତ ପରିପ୍ରକାଶ ।
ମଳୟ ପବନ ଆଣେ ଶିହରଣ
ଭରି ଦିଏ ଆଶା ମନରେ
ଧୀରେ ଧୀରେ ଆସି ପ୍ରେମୀ ପାଶେ ବସି
ମନ କଥା କହେ କାନରେ ।
ଅଳସୀ ଆଖିରେ ନିଦ ଆସେ ନାହିଁ
ଭାବୁଥାଏ ମନ ପ୍ରେମୀକୁ
ନିର୍ଜନ ରାତିର ନିସ୍ତବ୍ଦ ପ୍ରହରେ
ଛୁଇଁ ଯାଏ ଟିକେ ତନୁକୁ।