କଳା ଠାକୁର
କଳା ଠାକୁର
ହେ କଳା ଠାକୁର ବ୍ରଭୁ ବିଶ୍ୱେଶ୍ୱର
ସତ୍ୟଭାମା ଲକ୍ଷ୍ମୀ ପତି
କୋଟି ପ୍ରଣାମ ହେ ବୈକୁଣ୍ଠ ବିହାରୀ
ଜଣାଉଛି ମୂଢ଼ ମତି ।
ଦେଖିଦେଲେ ଥରେ କଳା ବଦନକୁ
ସ୍ୱର୍ଗ ସୁଖ ମିଳିଯାଏ
ତୋ ବଡ଼ ଦାଣ୍ଡରେ ପାଦ ପଡିଗଲେ
ପ୍ରାଣେ ତୃପ୍ତି ଭରିଯାଏ ।
ତୋର ନୀଳ ଚକ୍ର ବାନାକୁ ଦେଖିଲେ
ସ୍ବର୍ଗରେ ପହଞ୍ଚେ ମନ
କି ମାୟା ଲଗାଉ ଭକ୍ତଙ୍କ ମନରେ
ଆହା ମୋ କାଳିଆ ଧନ ।
କୋଟି ଓଡ଼ିଆଙ୍କ ମଉଡମଣୀ ତୁ
ଆହେ କାଳିଆ ଠାକୁର
ଦୁଃଖୀ ଜନ ଦୁଃଖ ହରିବୁ ବୋଲି ତୁ
ରଥରେ ହେଉ ବାହାର ।
ଭକ୍ତ ଜନ ବନ୍ଧୁ ଆହେ କୃପା ସିନ୍ଧୁ
ଭକ୍ତିରେ ସନ୍ତୁଷ୍ଟ ହେଉ
ଭକତି ଚିତ୍ତରେ ଡାକି ଦେଲେ ତୋତେ
ବିସ୍ତାରୁ ତୁ ମହାବାହୁ ।
କିମିଆଁ କରଇ କଳା ରୂପ ତୋର
ସେ ରୂପ ଦେଖିବା ପାଇଁ
ସାରା ଜଗତରୁ ଶ୍ରୀକ୍ଷେତ୍ରକୁ ତୋର
ପତିତ ଆସନ୍ତି ଧାଇଁ ।
ସାରା ଜନମର ପାପ ଧୋଇଯାଏ
ଦେଖିଲେ ଶ୍ରୀମୁଖ ତୋର
ରତନ ବେଦୀରେ ମହାବାହୁ ମେଲି
ବସିଛୁ କଳା ଠାକୁର ।
ସେ ରଙ୍ଗ ଅଧର ଚାହାଣି ମଧୁର
କୃପା ନେତ୍ରେ ଥାଉ ଚାହିଁ
ତୋର କୃପା ବିନୁ ଗତି ମୁକ୍ତି ନାହିଁ
ଆହେ କାଳିଆ ଗୋସାଇଁ ।