ଶ୍ରଦ୍ଧାରେ ସାଉଁଟେ ଶରଧା ବାଲି
ଶ୍ରଦ୍ଧାରେ ସାଉଁଟେ ଶରଧା ବାଲି
ଶ୍ରୀ ମନ୍ଦିର ଆଉ ଗୁଣ୍ଡିଚା ମନ୍ଦିର
ମଝିରେ ମାଳିନୀ ନଦୀ
ଆଷାଢ ମାସରେ ବନ୍ୟା ଆସିଗଲେ
କାଳିଆ ହୁଅଇ ବନ୍ଦୀ |
ପାଟ ମହାଦେଇ ଶରଦ୍ଧା ମଣିଙ୍କ
ଦର୍ଶନେ ଉପୁଜେ ବାଧା
ଜଳବନ୍ଦୀ ହୋଇ ଗୁଣ୍ଡିଚା ମନ୍ଦିରେ
ଯାତରା ରୁହଇ ଅଧା |
ଅନ୍ନ ଜଳ ସ୍ପର୍ଶ କରନ୍ତିନି ରାଜା
ଭାନୁଦେବଙ୍କର ମାତା
ସପନରେ ଆସି କାଳିଆ ସାଆନ୍ତେ
କହିଲେ ଗହନ କଥା |
ବଡ଼ ଦାଣ୍ଡେ ଥିବେ ଯେତେ ଭକ୍ତ ମୋର
କହିବ ଏ କଥା ଯାଇ
ସମୁଦ୍ରରୁ ଆଣି ମୁଠେ ମୁଠେ ବାଲି
ନଦୀକୁ ଦେବେ ପୋତେଇ |
ଯେତେ ଭକ୍ତ ଥିଲେ ସମୁଦ୍ରରୁ ଯାଇ
ଶ୍ରଦ୍ଧାରେ ଆଣିଲେ ବାଲି
ମାଳିନୀ ନଦୀଟା ପୋତି ହୋଇଗଲା
ହୋଇଲା ଶରଧା ବାଲି |
ଶରଦ୍ଧା ଦେବୀଙ୍କ ଭକ୍ତିର ପ୍ରତୀକ
ଶରଧା ବାଲିର ନାମ
ଧନ ଜନ କିଛି ଲୋଡ଼ନ୍ତିନି ଭକ୍ତ
ଯାଇ ଜଗନ୍ନାଥ ଧାମ |
ଶରଧା ବାଲିରୁ ମାଗନ୍ତି ସେ ହାତେ
ଭକ୍ତି ଭାବ ହୃଦେ ବହି
ନୀଳ ଚକ୍ରକୁ ସେ ଦର୍ଶନ କରିବେ
ଦୁଇ ପାଦ ସେଠି ଥୋଇ ।