ରଥ ପଥ ଜଗନ୍ନାଥ
ରଥ ପଥ ଜଗନ୍ନାଥ
ରଥ ତୋର ନନ୍ଦିଘୋଷ ପଥ ବଡ଼ ଦାଣ୍ଡ
ଘୋଷ ଯାତ୍ରା ବେଳେ ଖାଲି ଦିଶୁଥାଏ ମୁଣ୍ଡ |
ତାଳଧ୍ୱଜ ରଥେ ବିଜେ ତୋର ବଡ଼ ଭାଇ
ଦେଵଦଳନ ରଥରେ ସୁଭଦ୍ରା ଆସଇ |
ଜନ ସମୁଦ୍ର ଲହଡି ବଡଦାଣ୍ଡେ ତୋର
ଦର୍ଶନ ପାଆନ୍ତି ଯିଏ ଲାଗେ ଭକ୍ତି ଡୋର |
ବାମନ ବେଶରେ ଦେଉ ରଥେ ଦରଶନ
ଦର୍ଶନରେ ତୋର ପାପ ହୁଅଇ ଖଣ୍ଡନ |
ଟାହିଆ ହଲେଇ ହେଉ ପହଣ୍ଡିରେ ବିଜେ
ଦେଖି ଏ ପହଣ୍ଡି ଭକ୍ତ ଭକ୍ତି ରସେ ମଜେ |
ତୋର ରଥ ତୋର ପଥ ଆହେ ଜଗନ୍ନାଥ
ଦେଖିବାକୁ ସାରା ବିଶ୍ୱ ହୁଏ ଆକର୍ଷିତ |
କୋଟି କୋଟି ଭକ୍ତଙ୍କର ଦୁଃଖ ଶୁଣିବାକୁ
ବରଷକେ ଥରେ ଆସୁ ତୁ ବଡ଼ ଦାଣ୍ଡକୁ |
ପଲକ ପଡ଼େନି ତୋର ଚକା ନୟନରେ
ବଡ଼ ଦାଣ୍ଡେ ରଥ ଗଡେ ମହା ଆନନ୍ଦରେ |
ଭକ୍ତ ଟାଣୁଥାନ୍ତି ତୋର ରଥ ଦଉଡିକୁ
ମନେ ତାଙ୍କ ମହା ତୃପ୍ତି ଛୁଇଁ ତୋ ରଥକୁ |
ପତିତ ଜନଙ୍କ ଦୁଃଖ ଶୁଣିବାକୁ ଆସୁ
ଜନମ ବେଦୀରେ ଯାଇ ଆନନ୍ଦରେ ବସୁ |
ଜନମ ବେଦୀରେ ତତେ ଥରେ ଦେଖିଦେଲେ
ମହା ପାତକରୁ ଏ ଆତ୍ମାକୁ ମୁକ୍ତି ମିଳେ |