ସ୍ନାନ ପୁନେଇଁ
ସ୍ନାନ ପୁନେଇଁ
ସ୍ନାନ ମଣ୍ଡପରେ ସ୍ନାନ ପୁନେଇଁ
ଗଜାନନ ବେଶେ କଳା କହ୍ନେଇ |
ଜ୍ୟେଷ୍ଠ ମାସ ଏହି ପୂର୍ଣ୍ଣମୀ ତିଥି
ସ୍ନାନ ମଣ୍ଡପରେ ଜଗତ ପତି |
ସର୍ବାଗ୍ରେ ପୂଜିତ ବିଘ୍ନ ନାଶନ
ଗଣ ପତି ଭଟ୍ଟ ସ୍ମୃତି ଚାରଣ |
ଲୁଚି ଦେଖୁଥିଲ ଗୋପୀଙ୍କ ସ୍ନାନ
ମଣ୍ଡପରେ ଆଜି ଜଗତ ଜନ |
ସୁନା କୂଅ ପାଣି ସୁନା ଗରାରେ
ଶହେ ଆଠ ଗରା କି ଶରଧାରେ |
ଗାଧୋଇବା ପାଇଁ ପଣ୍ଡାଏ ବୋହି
ଅଗୁରୁ ଚନ୍ଦନ ମିଶାଇ ଦେଇ |
ସ୍ନାନ କରାନ୍ତି ବସି ମଣ୍ଡପରେ
ଦେଖି ଧନ୍ୟ ହୋନ୍ତି ଭକ୍ତ ନେତ୍ରରେ |
କୋଳାହଳମୟ ସ୍ନାନ ମଣ୍ଡପ
ଦର୍ଶନ ମାତ୍ରକେ ଛାଡଇ ପାପ |
ବଳଭଦ୍ର ସୁଦର୍ଶନଙ୍କ ପାଇଁ
ଗୋପାଳ ମଠରୁ ବେଶ ଆସଇ |
ଜଗନ୍ନାଥ ସୁଭଦ୍ରା ମାତା ପାଇଁ
ରାଘବ ଦାସ ମଠରୁ ଆସଇ |
ଧଳା ହାତୀ ବେଶେ ବଳ ଭଦର
କଳା ହାତୀ ଜଗତର ଠାକୁର |
ସୁଭଦ୍ରା ଭଉଣୀ ପଦ୍ମ ବେଶରେ
ଭକ୍ତଙ୍କୁ ଚାହାନ୍ତି କୃପା ନେତ୍ରରେ |
ବିଦ୍ୟା ବୁଦ୍ଧି ଦେଇ ବିଘ୍ନ ନାଶନ୍ତି
ଗଣପତି ବେଶ ପ୍ରଭୂ ହୁଅନ୍ତି |
ଗୋପ ଗୋପୀବୃନ୍ଦ ଶ୍ରୀକ୍ଷେତ୍ରେ ପଣ୍ଡା
ଚଢ଼ାନ୍ତି ଦୟଣା ତୁଳସୀ ଧଣ୍ଡା |
ରୌଦ୍ର ତାପରୁ ମିଳଇ ଆଶ୍ବସ୍ତି
ଜ୍ଵରରେ ଶୁଅନ୍ତି ଜଗତ ପତି |