ପ୍ରେମ

"ପ୍ରେମ" ବୋଲି ଯେଉଁ ଅଢେଇ ଅକ୍ଷର

କାନକୁ ଶୁଭଇ ଭଲ ।

ଏମିତି କେଉଁଠି କେହି ନାହିଁ ଯିଏ

ପ୍ରେମକୁ ନପାଏ ଭଲ ।୧।

ସୁନ୍ଦର ଏ ପ୍ରେମ ଯାହାର ସଂସ୍ପର୍ଶେ

ଦେବତା ହୁଅଇ ନର ।

ପ୍ରେମର ବନ୍ଧନ ହୁଏ ଚିରନ୍ତନ

ପ୍ରେମ ସର୍ବାଙ୍ଗ ସୁନ୍ଦର ।୨।

ପ୍ରେମର ଭଣ୍ଡାର ପରିପୂର୍ଣ୍ଣ ଥାଏ

ପ୍ରେମୀ ପ୍ରେମାସ୍ପଦ ପାଇଁ ।

ପ୍ରେମ ଆନନ୍ଦର ଉତ୍ତାଳ ଲହରୀ

ଧରା ସ୍ବର୍ଗ ପ୍ରେମ ପାଇ ।୩।

ପ୍ରେମ ବାରିଧାରା ବହେ ନିରନ୍ତର

ସୁଧା ସମ ବସୁଧାରେ ।

ଚିହ୍ନରା ଗ୍ରାହକ ଚିହ୍ନିଲେ ତାହାକୁ

ପାନ କରେ ଆନନ୍ଦରେ ।୪।

ପ୍ରେମସୁଧା ପାନ କଲେ ଦିନୁଁଦିନ

ଆନନ୍ଦ ହୁଏ ବର୍ଦ୍ଧନ ।

କଲେ ଆସ୍ୱାଦନ କ୍ରମେ ହୋଇଥାଏ

ପୂର୍ଣ୍ଣ ଅମୃତାସ୍ୱାଦନ ।୫।

ପ୍ରେମମୟଙ୍କର ପ୍ରେମ ବାରି ଲଭି

କୃତାର୍ଥ ହୁଏ ଜୀବନ ।

ମାନବ ଜନମ ସଫଳ ହୁଅଇ

ପ୍ରେମରସ କରି ପାନ ।୬।

ପ୍ରେମେ ମତ୍ତ ହୋଇ ନାମରସ ଗାଇ

ପ୍ରେମାସ୍ପଦଙ୍କ ପୟରେ ।

ସମର୍ପିତ ହୋଇ ଚିତ୍ତ ଲଗାଇଲେ

ଶାନ୍ତି ଲଭିବ ଅଚିରେ ।୭।

ପ୍ରେମଭକ୍ତି ସବୁ ଭକତିର ସାର

ଗଣ୍ଠିଧନ ତାକୁ କର ।

ଜୀବନ ନଉକା ବୁଡିବା ଆଗରୁ

ସେବ ପ୍ରେମୀଙ୍କ ପୟର ।୮।