ପ୍ରେମ ପୁଲକ ଚକଲେଟ୍ ଡେ
ପ୍ରେମ ପୁଲକ ଚକଲେଟ୍ ଡେ
ଚକୋଲେଟ ଶେଯ ବିଛାଇଛି ପ୍ରିୟା
ପ୍ରେମ ପିରତିର ପଥେ
ରହି ଥିବି ତାର ଜୀବନରେ ସଦା
ସବୁ ସୁଖ ଦୁଃଖ ସାଥେ ।।
ଚକୋଲେଟ
ସ୍ବାଦ ଯେମିତି ମଧୁର
ସେମିତି ତାର ଅଧର
ପ୍ରଜାପତି ପରି ସିଏ ରଙ୍ଗମୟ
ଲାଗେ ବଡ ମନୋହର ।।
ଅନୁତପ୍ତ ଭରା ପାହାଡ଼କୁ ଡେଇଁ
ଯିବି ତାର ପାଶେ ଦିନେ
କଷ୍ଟ ଦେଇଥିବା ପ୍ରାଣକୁ ତାହାର
ସଜାଇବି ଉପବନେ ।।
ଦୂନିଆ ଆଗରେ ଦୋଷ ମାନିନେବି
କରିଦେବ ସିଏ କ୍ଷମା
ତା ଇଚ୍ଛା ବିରୋଧେ କରିବିନି କିଛି
କଷ୍ଟ ଦେବି ନାହିଁ ଜମା ।।
କୁହୁଡ଼ି ପହଁରି କେତେ ଦିନ ଅବା
ଜାଳିବି ସନ୍ଦେହ ଦୀପ
ବଣମଲ୍ଲୀ ପରି ରହିବି ଜୀବନେ
ଭୋଗି ସବୁ ଅଭିଶାପ ।।
ନିଜ ସ୍ବାର୍ଥ ସବୁ ଜଳାଞ୍ଜଳି ଦେଇ
ତାର କଥା ବୁଝୁଥିବି
ମନକୁ ବୁଝାଇ ପ୍ରେମରେ ହଜାଇ
ସବୁ ସୁଖ ପାଇଯିବି ।।
ଆଜିର ଦିବସେ କରୁଛି ଶପଥ
ସଦା ପ୍ରେମେ ଜିଇଁଯିବି
ଚକୋଲେଟ ପରି ସମ୍ପର୍କରେ ସଦା
ମିଠା ସ୍ମୃତି ଭରିଥିବି ।।