ପ୍ରେମ ସାଗର
ପ୍ରେମ ସାଗର
କେବେ ଥରେ ଦେଖ ଭିଜାଇ ଦେହକୁ
ପ୍ରେମର ଘନ ନୀଳ ସାଗରରେ
ଜୀବନର ମର୍ମ ବଦଳି ହିଁ ଯିବ
ବାଜିଲେ ଢେଉ ଶୁଷ୍କ ଶରୀରରେ I
ଯେପରି ସ୍ପନ୍ଦନ ବିହୁନେ ଜୀବନ
ହୁଏନି ସମ୍ଭବ ଏହି ଧରାରେ
ସ୍ପନ୍ଦନର ମାନ ସେମିତି ରହିନି
ନ ଭିଜିଲେ ପ୍ରେମ ଏ ଜୁଆରରେ I
ଥାଉ କି ନ ଥାଉ ସାଥି କେହି ପାଖେ
ପ୍ରେମର ସାଗର ରହିଛି ସଦା
ଭିଜିବାକୁ ଦିଅ ତୁମ ତନୁ ମନ
ତାହା ସ୍ପର୍ଶରେ ହୋଇଯାଇ ଓଦା I
ମାପ କାଠି କିଛି ଗଢି ନାହିଁ କେହି,
ମାପିବାକୁ ଗଭୀରତା ପ୍ରେମର,
କଳ୍ପନା ଉର୍ଦ୍ଧ୍ଵରେ ମନ ଭାବନାରେ,
ଭରା ଅଟେ ଏହି ମହାସାଗର I।