ପ୍ରେମ ପାପ ନୁହେଁ

ବିଶ୍ବବିଧାତାଙ୍କ ଅସୀମ କୃପାରୁ

ସୃଷ୍ଟି ହୋଇଅଛି ସୃଷ୍ଟ ।

ପ୍ରକୃତିର କୋଳେ ମନୁଷ୍ଯାଦି ପ୍ରାଣୀ

ହୋଇଛନ୍ତି ସର୍ବେ ଜାତ ।

ଅନାଦି କାଳରୁ ପ୍ରାଣୀଙ୍କ ମଧ୍ୟରେ

ରହିଛି ନିବୀଡ ପ୍ରେମ ।

ପ୍ରେମ ବନ୍ଧନକୁ ପାଥେୟ କରିଣ

ବଞ୍ଚିଛନ୍ତି ମର୍ତ୍ତ୍ଯ ଧାମ ।

ପ୍ରେମର ସଂଜ୍ଞାଟି ଅଟଇ ବ୍ଯାପକ

କଦାପି ନୁହେଁ ସିମୀତ ।

ସୃଷ୍ଟିର ଉଦାର ଆଲୋକ ସଦୃଶ

ପ୍ରେମ ଯେ ଅଟେ ଅନନ୍ତ ।

ପ୍ରେମ ହିଁ ଶାଶ୍ବତ ଚିରନ୍ତନ ସତ୍ୟ

ପ୍ରେମ ଅଟେ ନୈସର୍ଗିକ ।

ଅନାବିଳ ପ୍ରେମେ ଥାଏ ନିତ୍ୟାନନ୍ଦ

ତା'ଦ୍ବାରା ସବୁ ସାର୍ଥକ ।

ପ୍ରେମ ପରିଭାଷାକୁ କରି କଦର୍ଥ

ଚାଲିଛି ଅବୈଧ ପ୍ରେମ ।

ପ୍ରତାରଣା ଆଉ ନିର୍ଯ୍ୟାତନା ସହ

ହେଉଛନ୍ତି ବଦନାମ ।

ସ୍ନେହ-ଶ୍ରଦ୍ଧା ଆଉ ପ୍ରୀତି ବିଶ୍ବାସର

ଅନ୍ଯ ନାମ ଅଟେ ପ୍ରେମ ।

ଏହା ବ୍ୟତିରେକ ସବୁ ହିଁ ନିଷ୍ଫଳ

ହୁଏ ତାହାର ଦୁର୍ନାମ ।

ଯେ ଦାତା-ଗ୍ରହିତା ଭୋକ୍ତା-ଭୋଜ୍ଯଦାତା

ରହସ୍ୟ କରେ ଜ୍ଞାପନ ।

ସେ ପୁଣି ରହସ୍ୟ କରେ ସଂଗ୍ରହଣ

ପ୍ରେମର ଷଡ ଲକ୍ଷଣ ।

ସ୍ତ୍ରୀ-ପୁରୁଷର ଦୈହିକ ମିଳନେ

ନ ହୁଏ କେବଳ ପ୍ରୀତି ।

ଭଲ ପାଇବାର ପ୍ରଗାଢ ବିଶ୍ବାସେ

ଦୃଢ ହୁଏ ପ୍ରେମ ସ୍ଥିତି ।

ଦୁଇ ହୃଦୟ ଓ ଆତ୍ମା ସଂପ୍ରୀତିରେ

ପ୍ରେମ ହୁଅଇ ନିବୀଡ ।

ଜନ୍ମ-ଜନ୍ମାନ୍ତର ସାଥି ହୋଇଥାନ୍ତି

କରି ମନ-ପ୍ରାଣ ସୁଦୃଢ଼ ।

ଯାହା ପ୍ରତି ଯା'ର ଥାଏ ଅନୁରାଗ

ବଢିଥାଏ ଗାଢ଼ ସଂପର୍କ ।

ପରସ୍ପର ସ୍ନେହେ ହୋଇଲେ ଆବଦ୍ଧ

ସେହି ପ୍ରେମ ହୁଏ ସାର୍ଥକ ।

ପ୍ରେମର ତାତ୍ପର୍ଯ୍ୟ ନୁହଁଇ କେବଳ

ଲାଳସା ଯେ କାମନାର ।

ଶରୀର ସଂପର୍କ ସରିଗଲା ପରେ

ପ୍ରେମ ହୋଇଯାଏ ଦୂର ।

ଏକ ତରଫାରେ ଭଲ ପାଇବାଟା

ନୁହଁଇ ପ୍ରକୃତ ପ୍ରେମ ।

ଦୁଃଖ-କଷ୍ଟ ଆଉ ଯନ୍ତ୍ରଣା ମିଳଇ

ଅଟେ ମରୀଚିକା ସମ ।

ଛଳ,କପଟ ପୁଣି ସ୍ବାର୍ଥର ପ୍ରେମ

ତୀକ୍ଷ୍ଣ ଛୁରିକା ସମ ।

ଧୋକା,ନିର୍ଯ୍ୟାତନା,ଚରିତ୍ର ସଂହାର

ହୁଅଇ ପୁଣି ଦୁଷ୍କର୍ମ ।

ଶ୍ରୀରାଧା କୃଷ୍ଣଙ୍କ ଶାଶ୍ବତ ପ୍ରେମ ଯେ

ଥିଲା ଶ୍ରେଷ୍ଠ ନିଦର୍ଶନ ।

ଭକ୍ତ-ଭଗବାନଙ୍କ ଭକ୍ତି ସଂପର୍କ

ଭାବ ଥିଲା ସମର୍ପଣ ।

ଷୋଳ ସହସ୍ର ଗୋପୀମାନଙ୍କ ସହ

କୃଷ୍ଣଙ୍କର ଯେଉଁ ଭାବ ।

ଭକ୍ତି ରସେ ଗୋପୀ ହୋଇଣ ତଲ୍ଲିନ

ସ୍ମରିଲେ ଚିତ୍ତେ ମାଧବ ।

କେଦାରଗୌରୀ-ଲୈଲା ମଜ୍ନୁଙ୍କ ପ୍ରେମ

ହୋଇଅଛି ଯେ ଅମର ।

ଶାହାଜାହାନ ମମତାଜ୍ ପ୍ରଣୟର

ସ୍ମୃତି ତାଜମହଲର ।

ସୂର୍ଯ୍ୟଙ୍କ ସହିତ ଯଥା କମଳର

ଅଭେଦ ପ୍ରୀତି ସଂପର୍କ ।

ତଥା କୁମୁଦର ସହ ଚନ୍ଦ୍ରଙ୍କ ଭାବ

ରହିଛି ସଦା ନିଛକ ।

ଧନରତ୍ନ ଠାରୁ ପ୍ରେମରତନ ଯେ

ଅଟେ ଅମୂଲ୍ୟ ସଂପଦ ।

ଭାବ ଓ ବିଶ୍ବାସ ଧନ ବିନିମୟେ

କ୍ରୟ ହୁଏ ଯେ ନିଶ୍ଚିତ ।

କାମର ଜ୍ବାଳାରେ ହୋଇଣ ଉନ୍ମତ

କାମାନ୍ଧ ରାକ୍ଷସ ଗଣ ।

ପ୍ରେମ ବାହାନାରେ ଅର୍ଥ ମାଧ୍ୟମରେ

ଦୁଷ୍କର୍ମ କରନ୍ତି ଜାଣ ।

ଜାତି-ଧର୍ମ-ବର୍ଣ୍ଣ ନିର୍ବିଶେଷେ ନର

ହେଲେ ପ୍ରେମରେ ବନ୍ଧନ ।

ନ ଦେଇପାରିବେ କେ ସେ ପ୍ରେମେ ବାଧା

ରହିବ ସଦା ଅକ୍ଷୂର୍ଣ୍ଣ ।

ପ୍ରେମ ପାପ ନୁହେଁ ଏହା ଅଟେ ସତ୍ଯ

ଯଦି ତାହା ସଚ୍ଚା ପ୍ରେମ ।

ପ୍ରେମ ହୀନ ନର ପଶୁ ତୁଲ୍ୟ ଜାଣ

ପ୍ରେମ ହିଁ ଶାଶ୍ବତ ଧର୍ମ ।