ପ୍ରେମ କର ମତେ ବୋଲି

ତୁମେ ପ୍ରେମ କର ବୋଲି

ଜାହିର କର ମୋ ପାଖରେ

ଦୁନିଆଁର ଅମାପ ସୁଖ ଶାନ୍ତି ଆଣି

ପାଦ ତଳେ ଅଜାଡ଼ି ଦେବ ବୋଲି 

ବାରମ୍ବାର କୁହ ।

ହେଲେ ସେହି ପ୍ରେମ 

ମୋ ଆଖିରେ ଅଶ୍ରୁ ସାଜେ କାହିଁକି ?

କାହିଁକି ତୁମ ବିନା ମଧ୍ୟ 

ଜୀଇଁବା ପାଇଁ ମନ ହୁଏ 

ସବୁ ପ୍ରଶ୍ନର ଉତ୍ତର 

ତୁମେ ନିଜେ ;କିନ୍ତୁ

ପ୍ରତିଟି କଥାରେ ମତେ

ଅପମାନିତ କରି 

ବାଜିର କଉଡ଼ି ସାଜି

ଖେଳୁଥାଅ ମୋ ହୃଦୟକୁ

ଯେଉଁ ପ୍ରେମ ପାଇଁ

ମୋ ଆଖିରେ ସ୍ବପ୍ନ ଭରିଥିଲ

ସେହି ପ୍ରେମରେ ସ୍ବାର୍ଥର

ପୁଟୁଳି ବାନ୍ଧି

ମତେ ଅନ୍ଧୁଣୀ ସଜେଇଦେଲ ।

ତୁମ ବିନା ବଞ୍ଚିବାର କାରଣ

ଯେପରି ନଥିଲା 

ମୃଗତୃଷ୍ଣା ପରି

ତୁମ ଚର୍ତୁପାର୍ଶ୍ବରେ ମୁଁ

ଘୂରି ବୁଲୁଥିଲି

ହେଲେ ତୁମେ

ପୂର୍ଣ୍ଣଚ୍ଛେଦ ପକେଇଦେଲ

ମୋର ଜୀବନ ପୃଷ୍ଠାରେ ।

ମୁକ୍ତାକାଶ ର ପକ୍ଷୀକୁ

ପିଞ୍ଜରାରେ ବାନ୍ଧିଦେଲ

ଛଳନାର ଶିକୁଳିରେ ଛନ୍ଦିହୋଇ

ମାଟି କାମୁଡ଼ି ପଡ଼ି ରହିଲି

ତୁମର ପ୍ରେମ ଟିଲେ ପାଇଁ 

ତଥାପି ତୁମେ ଜାହିର କର

ପ୍ରେମ କର ମତେ ବୋଲି ।