ପ୍ରେମ ଜ୍ଞାନ

 ଜୀବନରେ ମୋର ଆସି ତ ନଥିଲେ

   ତୁମରି ଆଗରୁ କେହି ।

ପ୍ରେମ ଜ୍ଞାନ ତେଣୁ ମୋହରି ନଥିଲା

   ପ୍ରେମ କରିବାର ପାଇଁ ।।

କୋଳରେ ତୁମର ବସାଇ ଗେଲରେ

   ସିଲଟ ଧରାଇ ମୋତେ ।

ପ୍ରେମର ଅକ୍ଷର ଶିଖାଇଲ ତୁମେ

   ଯତ୍ନ ନେଇ ମୋର କେତେ ।।

ଶିଖିଗଲି ମୁହିଁ ଅବନା ଶବ୍ଦକୁ

  ପଦ ବି ପାରିଲି ଲେଖି ।

ଛୋଟ ଛୋଟ ବାକ୍ୟ ଗଠନ କରିଲି

   ତୁମରି ଚେହେରା ଦେଖି ।।

ଏହା ଦେଖି ତୁମେ ପ୍ରେମ ଫଳା ମାତ୍ରା

   ଆନନ୍ଦେ ଶିଖାଇ ଦେଲ ।

ଶିଖିବା ପୂର୍ବରୁ କାହିଁକି ପ୍ରିୟା ଗୋ

   ଅନ୍ତର୍ଦ୍ଧାନ ତୁମେ ହେଲ ।।

ଜାଣି ମୁଁ ନଥିଲି ପ୍ରେମ ପରିଭାଷା

   ଜଣାଇଲ କାହିଁ ପାଇଁ ।

ଅହରହ ଆଜି ଆଘାତ ପାଉଛି

   ଶବ୍ଦର ଅଶୁଦ୍ଧି ପାଇଁ ।।

ଅନେକ ବାକ୍ୟ ମୁଁ ଗଠନ କରିଛି

   ଅବନା ଶବ୍ଦକୁ ନେଇ ।

ଏବେ ବି ଅପେକ୍ଷା କରିଛି ତୁମକୁ

   ଅଧିକ ଶିଖିବା ପାଇଁ ।।

ଫେରିଆସ ପ୍ରିୟା ମୋର ହୃଦୟକୁ

   ପ୍ରେମ ଜ୍ଞାନ ଦିଅ ମୋତେ ।

ମାତ୍ରା ଫଳା ସବୁ ଶିଖାଇ ଦିଅଣ

   ପରିପକ୍ୱ କର ସତେ ।।