Library
Profile
ପ୍ରଚଣ୍ଡ ରୌଦ୍ରତାପ ରେ ଉତ୍ତପ୍ତ
ପ୍ରଚଣ୍ଡ ରୌଦ୍ରତାପ ରେ ଉତ୍ତପ୍ତ
ପ୍ରଚଣ୍ଡ ରୌଦ୍ରତାପରେ ଉତ୍ତପ୍ତ ଧରିତ୍ରୀ
ପ୍ରବାହିତ ହେଉଅଛି ଝାଞ୍ଜି ନିତି ନିତି ।
ପ୍ରଚଣ୍ଡ ସଞ୍ଚରି ତପ୍ତ ବାତ ଓ ଆତପ
ପ୍ରତିକ୍ଷଣେ ପ୍ରାଣେ ବୁଣେ ଅତିଶୟ ତାପ ।
ପଙ୍ଖା ଓ ବ୍ୟଜନେ ବଢେ ସଭିଙ୍କ ଆଦର
ପ୍ରାଣଘାତୀ କଷ୍ଟ କିନ୍ତୁ ସହନ୍ତି ଦରିଦ୍ର ।
ପ୍ରଖର ଖର କିରଣ ପୀଡା ପାଇ ଜନ
ପ୍ରହାର କଷଣ କରେ ଜୀବନ ଉଚ୍ଛନ୍ନ ।
ପ୍ରଖର ନିଦାଘ ଦଗ୍ଧ କରେ ନିଦାରୁଣ
ପ୍ରାଣୀଙ୍କ ଜୀବନ ଆହା , ଭୀଷଣ କରୁଣ ।
ପ୍ରଭାତେ ସକଳେ ସାରି ନିଜ ନିଜ କାର୍ଯ୍ୟ
ପ୍ରବେଶି ମଧ୍ୟାହ୍ନ ପୂର୍ବୁ ଆପଣା ଆଳୟ ।
ପ୍ରତି କ୍ଷଣରେ ପ୍ରତୀକ୍ଷମାଣ ନେତ୍ରେ ଚାହିଁ
ପ୍ରଖର ଖରାର ତାତି ଦିଅନ୍ତି ବିତାଇ ।
ପ୍ରଦୋଷ ବେଳକୁ ପୁଣି ବାହାରି ଯାଆନ୍ତି
ପ୍ରତ୍ୟଙ୍ଗ ସକଳ ଝାଳେ ଯାଉଥାଏ ତିନ୍ତି ।
ପଶୁପକ୍ଷୀ ଜୀବଜନ୍ତୁ ହୁଅନ୍ତି ବିକଳ
ପୁଷ୍କରିଣୀ ଶୁଷ୍କ ହୁଏ ନମିଳଇ ଜଳ ।
ପତ୍ରଝଡ଼ା ଦେଇ ବୃକ୍ଷରାଜି ଦିଶେ ରୁକ୍ଷ
ପ୍ରଖର ଦାହ ପ୍ରହାର ପୀଡନ ଅସହ୍ୟ ।
ପ୍ରବାହିତ ତପ୍ତ ଝଡ ମାଡ଼ ହେତୁ ଭାରି
ପ୍ରଲେପ ବୋଳନ୍ତି ଦେହେ ଚନ୍ଦନକୁ ଘୋରି ।
ପଣା , ପଖାଳ ଇତ୍ୟାଦି ଶୀତଳ ପାନୀୟ
ପାନାହାରେ ସଭିଙ୍କର ବଢ଼ଇ ଆଗ୍ରହ ।
ପ୍ରପାତ, ଝରଣ , ଶୁଷ୍କ କ୍ଷୀଣ ଓ ନୀରସ
ପ୍ରଚଣ୍ଡ ରୌଦ୍ରତାପରେ
;ଧରିତ୍ରୀ ନୀରସ ।
ପ୍ରଚଣ୍ଡ ଚଣ୍ଡାଂଶୁ ଅଂଶୁ ଦେଉଥାଏ ଜାଳି
ପ୍ରତି ପଦେ ନେଉଥାଏ ପାନ୍ଥ ଆୟୁ ହରି ।
ପ୍ରକୃତି ପ୍ରତାପେ ତାପେ ତାପିତ ସଭିଏଁ
ପ୍ରଚଣ୍ଡ ଚଣ୍ଡାଂଶୁ ଅଂଶୁ ଅଂଶୁଘାତ ରଚେ ।
ପ୍ରାଣୀକୁଳ ଦୁଃଖ ଜାଳ ସହି ଦୁଃର୍ବିସହ
ପ୍ରାଣ ବିକଳରେ ଜଳେ ନିଅନ୍ତି ଆଶ୍ରୟ ।
ପଶୁଏ ଲୋଟନ୍ତି ପଙ୍କେ ଶତୃତା ବିସ୍ମରି
ପ୍ରଖର ଆତପ ଘାତେ କେତେ ଯା'ନ୍ତି ମରି ।
ପ୍ରଚଣ୍ଡ ରୌଦ୍ର ଉତ୍ତପ୍ତ ବାତ ପ୍ରବାହିତ
ପ୍ରକୃତିରେ ଧ୍ଵଂସ ଲୀଳା ରଚେ ଅବାରିତ ।
ପ୍ରଖର ଖରାରେ ନାନା ସ୍ଥାନରେ ବନାଗ୍ନି
ପ୍ରସାରିତ ହୋଇ ଦହି ଦିଏ ଅଗନାଗ୍ନି ।
ପ୍ରକାଣ୍ଡ ବନସ୍ତ ଧ୍ବସ୍ତ କରେ ନିମିଷକେ
ପଶୁପକ୍ଷୀ ଜୀବଜନ୍ତୁ ପତଙ୍ଗ ସହିତେ ।
ପ୍ରବଳ ଗରମ ଘାତେ ହତ ମୁହୁମୁର୍ହୁ
ପ୍ରଖର ଖରାରେ ସର୍ବେ ଆହା ଉହୁ ଉହୁଃ ।
ପ୍ରଚଣ୍ଡ ନିଦାଘ ନିଦାରୁଣ ଯନ୍ତ୍ରଣାରେ
ପ୍ରଗାଢ଼ ପୀଡନ ଜ୍ଵାଳା , ଆଘାତ ସଞ୍ଚାରେ ।
ପ୍ରଚଣ୍ଡ ମଧ୍ୟାହ୍ନ ରବି ରଶ୍ମି ପ୍ରତାପରେ
ପ୍ରବାହିତ ଖଞ୍ଜା ବାତ ଓ ଗୁଳୁଗୁଳିରେ ।
ପାଆନ୍ତି ଭୀଷଣ , ପୀଡା ପ୍ରାଣୀ ଜଗତକୁ
ପ୍ରଭାବିତ କରେ ସୃଜି ଉତ୍ତପ୍ତ ତାପକୁ ।
ପ୍ରାଣଘାତୀ କଷ୍ଟ ଜ୍ଵାଳା ଦାହ ପ୍ରହାରରେ
ପ୍ରାଣୀଙ୍କର କଣ୍ଠ ଶୁଖେ , ଜନେ ହତ କରେ ।
