ପ୍ରାୟଶ୍ଚିତ
ପ୍ରାୟଶ୍ଚିତ
ସବୁ ଥିଲା ମୋର ଦୋଷ
ଯେତେ ରାଗ ରୁଷା ରୋଷ
ହେଜୁଛି ଆଜି ଏକାନ୍ତ ବାସେ
ପ୍ରବାସେ କରଇ କ୍ଷମା ଯାଚନା
ତୁମରି ବିଶାଳ ହୃଦୟ ପାଶେ!!
ପ୍ରଚଣ୍ଡ ଆତ୍ମାଭିମାନ ସହିତ
ତାରୁଣ୍ୟର ଉଦ୍ଧାମତା ଅହମିକାର
ଅମୁହାଁ ଅଫେରା ପ୍ରତିସ୍ପର୍ଦ୍ଧାରେ
ଲଂଘି ମୁଁ ଯାଇଛି ଅବିବେକୀତାରେ
ସୃଷ୍ଟିର ସମସ୍ତ ସୀମାରେଖା!!
ଭୂଲୁଣ୍ଠିତ ବିବେକ କବଚ ମୋହର
କରିନାହିଁ କେବେ ତିଳେ ପ୍ରତିବାଦ
ଅସଂଖ୍ୟ ଅଗଣିତ କ୍ଷତାକ୍ତ ହୃଦୟ
ପ୍ରତାରିତ ପ୍ରାଣର କରୁଣ ଆର୍ତ୍ତନାଦ
ପ୍ରସ୍ତର ଗାତ୍ରରେ କରିଛି ରେଖାପାତ!!
କରଇ ଆଜି କୃତକର୍ମର ପଶ୍ଚାତାପ
ଜାଣେନା ପାପ ପୂଣ୍ୟର ଫରକ
ତଥାପି କରେ ଗଭୀର ମନସ୍ତାପ
ଅବଶିଷ୍ଟ ଜୀବନ ଧରି ପଶ୍ଚାତାପ
ହେବ ମୋ ଲାଗି ଶ୍ରେଷ୍ଠ ପ୍ରାୟଶ୍ଚିତ!!