ପ୍ରାର୍ଥନା

ପ୍ରାର୍ଥନା ଅଟଇ ପ୍ରେରିତ ଧାରାଟେ

ମନ କୁ କରେ ଆପ୍ଳୁତ

ନିଜ ମନ କରେ ପବିତ୍ର ନିର୍ମଳ

ପରିବେଶ ହୁଏ ପୁତ ।

ପ୍ରାର୍ଥନା ଅଟଇ ଏମିତି ଡୋରଟେ

ସାଥେ ଯୋଡ଼େ ଇଶ୍ୱରଙ୍କୁ

ପ୍ରାର୍ଥନାର ଭାବ ମହକାଏ ଦିଗ

ଉର୍ଜା ଦିଏ ଅନ୍ତରକୁ ।

ଭାବମୟ ଭରା ପ୍ରାର୍ଥନାରେ ପୂର୍ଣ୍ଣ

ବିଶ୍ଵାସର ପୁଣ୍ୟ ସ୍ରୋତ

ସେଇ ସ୍ରୋତେ ଧୋଇଯାଏ ଆବିଳତା

ମନ ହୋଇ ଥାଏ ଶାନ୍ତ ।

ପ୍ରାର୍ଥନାର ଶୁଦ୍ଧ ଭାବନାରେ ଗଢ଼ା

ନିଃସଂଶୟ ଦୃଢ ସେତୁ

ସେ ସେତୁ ହୁଅଇ ଜୀବନ ଆଧାର

ମିଳେ ଜୀବନର ହେତୁ ।

ପ୍ରାର୍ଥନା ଏମିତି ଶୁଦ୍ଧ ପୂତ ଧାରା

ମନେ ଭରିଦିଏ ଶାନ୍ତି

ପୂତ ପବିତ୍ରତା ମନେ ବିରାଜିଲେ

ବ୍ୟକ୍ତିତ୍ଵେ ଉକୁଟେ କାନ୍ତି ।

ଶଶବ୍ଦ ହେଉ କି ନିଃଶବ୍ଦ ପ୍ରାର୍ଥନା

ଶକ୍ତିର ସଂଚ଼ାର କରେ

ସମସ୍ୟା ଅନ୍ଧାରେ ଧଇର୍ଯ୍ୟ ଯୋଗାଏ

ଜୀବନ ଅର୍ଥ ଶିଖାଏ ।

ପ୍ରାର୍ଥନା ଏମିତି ପ୍ରୀତି ଆଞ୍ଜୁଳିଟେ

ଇନ୍ଦିୟକୁ ବଶ କରେ

ମନ ବିକାରକୁ ସମାଧିସ୍ଥ କରି

ପୁଣ୍ୟ ଭାବନାରେ ଭରେ ।

ପ୍ରାର୍ଥନା ଜାଳଇ ସଂସ୍କାର ଦିହୁଡି

ଚେତନା ଉଜ୍ଜ୍ବଳି ଉଠେ

ଆତ୍ମା ନିଜ ରଙ୍ଗେ ସଜେଇ ହୁଅଇ

ସନ୍ତୋଷ ସୁରଭି ଛୁଟେ ।

ପ୍ରାର୍ଥନାରେ ଶକ୍ତି ପ୍ରାର୍ଥନାରେ ମୁକ୍ତି

ଦିଏ ପୁଣି ଶାନ୍ତି ସ୍ପର୍ଶ

ଜୀବନ ଦର୍ଶନ ଶିଖାଇ ଥାଏ ସେ

କହେ ଜୀବନ ନିଷ୍କର୍ଷ ।

ପ୍ରାର୍ଥନା ରେ ଭରା ଅସୀମ ଶକତି

ପାପରୁ ନିବୃତ୍ତ କରେ

ପ୍ରାର୍ଥନା ଅନ୍ତରେ ବିଭୁ ପ୍ରେମ ଦିଏ

ସୁପଥେ ଯିବାକୁ କହେ ।

ବିଭୁପ୍ରେମେ ଯୋଡ଼ି ହେବାର ମାଧ୍ୟମ

ପ୍ରାର୍ଥନା ଭାବ ମହଲ

ପ୍ରାର୍ଥନା ଅଟଇ ପବିତ୍ର ବୃକ୍ଷଟେ

ସ୍ଥିରତା ତାହାର ଫଳ ।

ଦୁଃଖ ସମୟରେ ପ୍ରାର୍ଥନା ସାନ୍ତ୍ବନା

ସୁଖ କରେ ଅରପଣ

ପ୍ରାର୍ଥନାରେ ଝରେ ଅମୀୟ ଝରଣା

ଘୁଞ୍ଚାଇ ଥାଏ କଷଣ ।

ପ୍ରାର୍ଥନା କରଇ ବ୍ୟକ୍ତିକୁ ପବିତ୍ର

ପରିବେଶ ମହକାଏ

ପରିବାରେ ଏଇ ପ୍ରାର୍ଥନାର ଧାରା

ବ୍ୟକ୍ତିତ୍ଵ ଯେ ଗଢିଦିଏ ।

ପ୍ରାର୍ଥନା ପ୍ରଭାବ ଅଟେ ଚିରନ୍ତନ

ଶାସ୍ତ୍ର ରେ ଅଛି ପ୍ରମାଣ

ଭାବମୟତା ର ପ୍ରାର୍ଥନା ରେ ଅଛି

ପୁଣ୍ୟମୟ ସମର୍ପଣ ।

ମନୁ ପୋଛି ଦେଇ କଳୁଷ କାଳିମା

ପ୍ରଭୁ ଭାବ ଭରିଦେବା

ଭାବରେ ଭାବରେ ପ୍ରଭୁଙ୍କୁ ଡାକିବା

ଜୀବନ ଧନ୍ୟ କରିବା ।

ଆମରି ପ୍ରାର୍ଥନା ଭାବମୟ ହେଉ

ନ ହେଉ ଲୋକଦେଖାଣ

ଅନୁଭବ ସଦା କହି ଦେଉ ଥାଉ

ପ୍ରାର୍ଥନା କେତେ ମହାନ । ଅ