ପ୍ରାଣୀଙ୍କ କଲ୍ୟାଣ ହେବ
ପ୍ରାଣୀଙ୍କ କଲ୍ୟାଣ ହେବ
ଦୁନିଆରେ ଜ୍ଞାନ ବାଣ୍ଟିବା ଦାୟିତ୍ୱ
ଦେଇଛନ୍ତି ମୋତେ ପିତା,
ସେଥିପାଇଁ କେତେ ରଚିଲିଣି ପୋଥି
ଶ୍ରୀମହାଭାରତ, ଗୀତା ।
ବ୍ୟାସଦେବ ଯାହା ବଖାଣିଲେ ତୁଣ୍ଡେ
ଲେଖୁ ଲେଖୁ ଗଲା ବେଳ,
ତୋ ସାଥିରେ ତେଣୁ ମୂଷିକରେ ଆଉ
ଖେଳି ପାରୁନି ମୁଁ ଖେଳ ।
ଭାରତ ଯୁଦ୍ଧରେ ଅର୍ଜ୍ଜୁନଙ୍କୁ କୃଷ୍ଣ
ଦେଲେ ଯେଉଁ ଦିବ୍ୟ ବାଣୀ,
'ଗୀତା' ନାମେ ଖ୍ୟାତ ସେହି ପୁଣ୍ୟ ଗ୍ରନ୍ଥ
ଲେଖିଛି କର୍ତ୍ତବ୍ୟ ମଣି ।
ସବୁ ସମସ୍ୟାର ସମାଧାନ ଏଇ
ଶାସ୍ତ୍ରରେ ହୋଇଛି ଲେଖା,
ଶ୍ରଦ୍ଧା,ଭକତିରେ ପାଠ କରିବ ଯେ
କୃଷ୍ଣ ହେବେ ତା'ର ସଖା ।
ସୁଖ, ସଉଭାଗ୍ୟ ସବୁ ପାଇବ ସେ
ଦିବ୍ୟାନନ୍ଦେ ହେବ ମଗ୍ନ,
ସବୁ ଦେବତାଏ ସନ୍ତୋଷ ହୋଇବେ
ଆସିଯିବ ଶୁଭ ଲଗ୍ନ ।
ଦୁନିଆ ସାରା ଏ ଜ୍ଞାନ ପ୍ରସରିଲେ
ପ୍ରାଣୀଙ୍କ କଲ୍ୟାଣ ହେବ,
ଘଟେ ଥିବା ଆତ୍ମା ପରମାତ୍ମାଙ୍କର
ସନ୍ଧାନଟି ପାଇଯିବ ।