ପୋଷା ହାତୀ ଗଲା ରାଗି

ବିଗତ ଦିନର ନିଚ୍ଛକ ଘଟଣା

ପଡିଗଲେ ମନେ ଆଜି

ରୋମମୂଳ ସବୁ ଉଠଇ ଟାଙ୍କୁରି

ଭୟାନକ ଦୃଶ୍ୟ ହେଜି ।

ସ୍ଥାନ ହୀରାକୁଦ ସହର ଅଞ୍ଚଳ

ସମୟ ଦିନ ଦୁଇଟା

ମାହୁନ୍ତ ସହିତ ବୁଲୁଥିଲା ସୁଖେ

ଏକ ମସ୍ତ ହାତୀ ଦନ୍ତା ।

ପୋଷା ହାତୀ ଦେଖି ଦେଉଥିଲେ ଭେଟି

ଖାଦ୍ୟ କଦଳୀ ନଡ଼ିଆ

ମୁଣିରେ ସାଇତି ସାମଗ୍ରୀ ମାହୁନ୍ତ

ଭାବୁଥିଲା ଚାଲାକିଆ ।

ଦୈବାତ୍ ହୋଇଲା ମାହୁନ୍ତର ଭେଟ

ଶିକ୍ଷକ ରାମବିଳାସ

ଦୁହିଁଙ୍କର ଗାଆଁ ଥିଲା ପାଖ ପାଖ

ରାଜ୍ୟ ଉତ୍ତରପ୍ରଦେଶ ।

ହେଲେ ଗପସପ ବହୁତ ସମୟ

ହାତୀ ହୋଇଥିଲା ଠିଆ

କହିଲେ ମାଷ୍ଟର ହେଲା ଚିହ୍ନାଜଣା

ହେଉ କପେ କପେ ଚାହା ।

କହିଲା ମାହୁନ୍ତ ହାଲିଆ ହେଲାଣି

ଖରାତରା ବୁଲି ହାତୀ

ମାର ଗୋଲି ତାକୁ ହାତୀ ହେଉ ଫାତି

ଜମିବ ହିଁ ଚାହା ଖଟି ।

ଭିଡ଼ି ଟାଣୁଥିଲେ ମାହୁନ୍ତ ହାତକୁ

ଶିକ୍ଷକ ରାମବିଳାସ

ରାଗିଗଲା ହାତୀ ହଠାତ୍ ପ୍ରବଳ

ମୁଣ୍ଡରେ ଚଢ଼ିଲା ବିଷ ।

ଥୋଡ଼ରେ ତାହାର ଓଟାରି ଧରିଲା

ମାହୁନ୍ତ ଢିଲା ପଞ୍ଜାବୀ

ମାନିଲାନି ଜମା ମାହୁନ୍ତର କଥା

କଲା ଢିମା ଆଖି ନାଲି ।

ଲୁଗାପଟା ଛାଡ଼ି ଧାଇଁଲା ମାହୁନ୍ତ

ଜୀବନ ବିକଳ ହୋଇ

ଛପିଲା ଗୋଟିଏ କୋଠା ବାସଗୃହେ

ଝରକା କବାଟ ଡେଇଁ ।

ହୋଇ କୋପାନଳ ମତ୍ତ ଦନ୍ତାହାତୀ

ଚଳାଇଲା ମହାବାତ୍ୟା

ଭାଙ୍ଗିଲା ଦୋକାନ ଇଲେକ୍ଟ୍ରୀ ଖୁଣ୍ଟକୁ

ବାଟେ କରିଥିଲା ବଙ୍କା ।

ପଶିଲା ଗହଳି ବଜାର ଭିତରେ

କରିଲା ଦଳାଚକଟା

ମଲେ କିଛି ଲୋକ ହୋଇଲେ ଘାଇଲା

ଗୋଡ଼ ଭାଙ୍ଗି ହେଲେ ଛୋଟା ।

ରହିଥିଲା ଥାନା ସନ୍ନିକଟେ ବହୁ

ଚଳ ଓ ଅଚଳ ଗାଡି

ଶୁଣ୍ଢେ ଠେଲି ଠେଲି କାନ୍ଥରେ ବାଡେଇ

ଭାଙ୍ଗି ଦେଲା ମୋଡିମାଡି ।

ଲୋକଙ୍କୁ ସତର୍କ କରିବା ନିମନ୍ତେ

ସହରର ପ୍ରଶାସନ

ଡାକବାଜି ଯନ୍ତ୍ରେ କରିଲା ପ୍ରଚାର

ରୁହ ଜନେ ସାବଧାନ ।

ଗୋଡାଇଲା ଦନ୍ତା ମଟର ଗାଡିକୁ

ଶୁଣିପାରି ଉଚ୍ଚ ଶବ୍ଦ

ଖଣ୍ଡେ ଦୂର ପରେ ହୋଇଲାରୁ ସନ୍ଧ୍ୟା

ଶୋଇଗଲା ଲମ୍ବଖମ୍ବ ।

ତାପରେ ସକାଳୁ ଚଳାଇଲା ପୁଣି

ଆତଙ୍କର ଅଭିଯାନ

ରାସ୍ତା ଦୁଇ ପାର୍ଶ୍ୱ ଠେଲି ପେଲି ସବୁ

ଭାଙ୍ଗିଲା ଘର ଦୋକାନ ।

ଉଭା ହେଲା ହାତୀ ରେମେଡ ଛକରେ

ଜାତୀୟ ରାଜ ମାରଗେ

ଭାଙ୍ଗିଲା ଅନେକ ଘରଦ୍ୱାର ଗାଡ଼ି

ଗଣିଲେ ଲୋକ ପ୍ରମାଦେ ।

ଖବର ପାଇଣ ନନ୍ଦିନ କାନନୁ

ଅଭିଜ୍ଞ ପଶୁ ପାଳକ

ନିଶା ଗୋଳା ମାରି କରିଲେ ଅଚେତ

କାର୍ଯ୍ୟ ଅସାଧ୍ୟ ଓ କଷ୍ଟ ।

ହାତୀ ଗୋଡ ବାନ୍ଧି ଲୈ।ହ ଶିକୁଳିରେ

ସ୍ୱତନ୍ତ୍ର ରେଳ ଗାଡିରେ

ନିଆଗଲା ତାକୁ ନନ୍ଦିନ କାନନ

ଜାତୀୟ ପ୍ରାଣୀ ଉଦ୍ୟାନେ ।

ନର ବା ଗୁଞ୍ଜର ଅଥବା ବାନର

ତିନିଙ୍କ ପ୍ରଖର ବୁଦ୍ଧି

ଅପଶବ୍ଦ ଶୁଣି ବୁଝି ଭଲମନ୍ଦ

ପୋଷା ହାତୀ ଗଲା ରାଗି ।

ଟେକା ଓ ପଥର ନ ଫିଙ୍ଗ ପ୍ରାଣୀଙ୍କୁ

ନ କର ତାଙ୍କୁ ବିରକ୍ତ 

ସ୍ୱଭାବ ସ୍ୱଚ୍ଛନ୍ଦେ ବିଚରନ୍ତୁ ପ୍ରାଣୀ

ଦୂରତା ବଜାୟ ରଖ ।