ଭାବନାରେ ଭୟଭୀତ

ସପନା ବୋଲି ପିଲାଟିଏ ସେ ଭାରି ଡଉଲ ଡାଉଲ

ପଢଇ ପାଠ ସେ ଭଲ ଚାଟ ସଭିଏଁ କହନ୍ତି ଭଲ ।

ଖେଳ କୁଦରେ ଏକ ନମ୍ବର ସୁନ୍ଦର ସ୍ବାସ୍ଥ୍ୟ ତା'ର

ସାଙ୍ଗସାଥି କହନ୍ତି ସେ କରେ ଉତ୍ତମ ବ୍ୟବହାର ।

ଅଦିନ ଝଡ଼ ଆସିଲା ମାଡ଼ି ନୀରବ ହୋଇଗଲା

ମୁକ ପରିକା ବସିଲା ଖାଲି ବଲବଲ ଚାହିଁଲା।

ଖାଇଲା ନାହିଁ ପଢିଲା ନାହିଁ ବୁଲେ ଗାଁ ଦାଣ୍ଡରେ

କାହାକୁ ଚିହ୍ନି ପାରଇ ନାହିଁ ଲୁଗା ରଖେନା ଦେହରେ ।

ବିଧବା ମାଆ ବିଧବା ଆଈ ହାତରେ ମୁଣ୍ଡ ଦେଲେ

ଅଭିଶପ୍ତ ସେ ପରିବାରରେ ଗୋଟେ ବି ପୁଅ ନାହିଁ ।

କହନ୍ତି ଲୋକେ ଅବିଶ୍ୱାସର କାହାଣୀ କେତେ କେତେ

ଦାଣ୍ଡ ଦୁଆର ତାଳ ଗଛରେ ଅଛନ୍ତି ଆତ୍ମା ଯେତେ ।

ଅନ୍ଧାର ଯେତେ ଗହଳ ହୁଏ ନିରୋଳା ରାସ୍ତା ହୁଏ

ଭୟଙ୍କର ମାନ ଶବଦ ବିକଟାଳ ଛାୟା ଦେଖାଯାଏ।

କାହାର ଅଭିଶାପ ଯୋଗୁଁ ସେ ବଂଶର ଯେତେ ପୁରୁଷ

ଅଳ୍ପ ବୟସେ ମୃତ୍ୟୁ ବରଣ ସେ ଘରୁ ଲିଭେ ହସ ।

ସେ ଆତ୍ମାମାନେ ଅତୃପ୍ତ ଭାବେ ଚତୁର୍ପାର୍ଶ୍ବେ ବୁଲନ୍ତି

ଅସ୍ବାଭାବିକ ଘଟଣାମାନ ସଦା ଭିଆଉ ଥାନ୍ତି ।

ପୋଖରୀ କୂଳ ଆର ପଟରେ ଥାଇ ତାଳି ମାରନ୍ତି

ନୀଳ ଆଲୋକ ଏପଟରୁ ସେପଟ ବୁଲୁ ଥାଆନ୍ତି ।

ଏକଦା ସନିଆଁ ପୂଜା ପୂର୍ବ ରାତିର କଥା ଇଏ

ଚୁଡା କୁଟିବା ପାଇଁ ଧାନକୁ ପାଣିରେ ଭିଜେଇ ଥାଏ ।

ସାହିର ଜଣେ ଖୁଡୀକୁ କହେ ଶୋଇବୁ ଆଜି ମୋ ଘରେ 

ରାତି ଅଧରୁ କୁଟିବା ଚୁଡା ସରିବ ରାତି ପାହିଲେ ।

ହଁ ଭରି ସେ ମହିଳା ଗଲେ ସଂଜରେ ଆସିଲେ ନାହିଁ,

ଖାଇପିଇ କି ସପନା ମାଆ ଘୁଙ୍ଗୁଡ଼ି ମାରିଲେ ଶୋଇ ।

କେଜାଣି କେତେ ରାତି ହୋଇଛି ଡାକିଲେ କିଏ ଆସି

କବାଟ ଖୋଲ ସପନା ବୋଉ ଉଭା ମୁଁ ଦୁଆରେ ଆସି ।

ରାତି ଅଧରୁ ରାତି ପାହିଲା ଚୁଡା କୁଟା ସରିଲା

ଶେଷରେ ଗଲେ ପୋଖରୀ ପାଣି ତା ପରେ ଚେତା ବୁଡିଲା ।

ସପନା ବୋଉ ଅବସ୍ଥା ଦେଖି ଲୋକେ ପାଣି ଛାଟିଲେ

କହିଲା ଯାହା ଶୁଣି ଲୋକ ଯେ ଆଶ୍ଚର୍ଯ୍ୟ ହୋଇଲେ ।

ଭୟାନକ ଦୃଶ୍ୟ ଦେଖି ସହି ଛାତି ସହି ନ ପାରିଲା

ଦୁର୍ବଳ ମନେ ଏଭଳି ଭୟେ ଆତ୍ମାର କାର୍ଯ୍ୟ ଭାବିଲା ।।

ଘଟେ ଏଭଳି ଘଟଣାସବୁ ଶୁଣିଛୁ କର୍ଣ୍ଣେ ତାହା

ଯାହା ବି ହେଉ ଅନେକ ଚୁଡା ବିକିଲା ସପନା ମାଆ।