ଜରିଗୋଟାଳି

  

ଶୈଶବକୁ ତାର ଦେଇଛି ବଳି,

ପରିସ୍ଥିତି ସାଥେ କରିନି କଳି ।

ଶାନ୍ତ ଅଶାନ୍ତର ସାଗର ଘାଟେ,

ଜୁଝୁଛି ଜୀବନ ଖାଇବ ମୁଠେ ।

ସପନ ବିହୀନ ଦିନ ଓ ରାତି,

ଖେଳିବାକୁ କେବେ ଖୋଜିନି ସାଥୀ ।

ଅଭାବୀ ଘରେ ତା ହୋଇଛି ଜନ୍ମ,

ବାଳୁତ କାଳରୁ କରୁଛି କର୍ମ ।

ରାତି ପାହି ଯେବେ ସକାଳ ହୁଏ,

ପରଘରେ ମା କାମକୁ ଯାଏ ।

ସଞ୍ଜ ନଇଁଗଲେ ରାତି ମାଡଇ,

ଟଳମଳ ପାଦେ ବାପା ଫେରଇ ।

ସହର ଯାକର ଅଳିଆଗଦା,

ସବୁଠିକୁ ଯିବ କରେ ମସୁଧା ।

ଘୁରି ବୁଲୁଥାଏ ଗଳିରୁ ଗଳି,

ଲୋକେ ଡାକୁଥାନ୍ତି ଜରିଗୋଟାଳି ।