ସାମ୍ରାଜ୍ୟ

ଏ ସାରା ସଂସାର ସାମ୍ରାଜ୍ୟ ତୁମ୍ଭର

ଛୋଟ ପରଜାଟେ ମୁହିଁ,

ମୋ ଜୀବନ ପ୍ରାଣ ସବୁ ତୁମ ଦାନ

ତୁମ ବିନା ଗତି ନାହିଁ ।

ଯେବେ ଚାଲେ ପଥ ଧରିଥାଅ ହାତ

ଇସାରାରେ କୁହ କଥା,

ସୁପଥରେ ଗଲେ ସୁଖ ଦିଅ ଭଲେ

କୁପଥରେ ମିଳେ ବ୍ୟଥା ।

ହେ ବିଶ୍ବ ନିୟତି ଧରିଛ ନିକିତି

ପାପ ପୁଣ୍ୟ ଦୁଇ ପାଖ,

କର୍ମ ଅନୁସାରେ ଫଳ ପ୍ରାପ୍ତ ହୁଏ

କେବେ ଦୁଃଖ କେବେ ସୁଖ ।

ଏ ବିଶାଳ ସ୍ଥଳ ସାଗରର ଜଳ

ସବୁତ ଦେଇଛ ତୁମେ,

ତୁମରି ସତ୍ତାକୁ ଅନୁଭବେ ଯିଏ

ମାୟାରେ କେବେ ନା ଭ୍ରମେ ।

ହେ ବିଶ୍ବ ବିଧାତା ଜଗତ କରତା

ତୁମେ ଭାଗ୍ୟ ଭଗବାନ,

ସାରା ବିଶ୍ଵବାସୀ ରୁହନ୍ତୁ ଉଶ୍ବାସି

ତବ ପ୍ରେମେ ହୋଇ ମଗ୍ନ ।