ବ୍ରହ୍ମଦାରୁ

ସିନ୍ଧୁ ତୀର କ୍ଷେତ୍ରବର ଶ୍ରୀନୀଳକନ୍ଦର 

ବିଜେ ତହିଁ ବ୍ରହ୍ମଦାରୁ ପରମ ଈଶ୍ୱର |

ଯେ କ୍ଷେତ୍ର ମହିମା ଚରାଚରେ ଅଗୋଚର 

ମର୍ତ୍ତ୍ୟ ବଇକୁଣ୍ଠକମ୍ବୁ କଟକ ସୁନ୍ଦର |

ବ୍ରହ୍ମା ଡାକୁଛନ୍ତି ଯା'ରେ ମଣିମା ମଣିମା 

ଇନ୍ଦ୍ର ଡାକୁଛନ୍ତି ଦେବ ଗୁହାରୀ ଶୁଣିମା |

ଦେବ ଦେବ ମହାଦେବ ଯହିଁ ସ୍ତୁତିରତ 

ବରୁଣ କୁବେର ଉଭା ହୋଇ ମଥାନତ |

ପବନ କରନ୍ତି ମୃଦୁ ବ୍ୟଞ୍ଜନ ଚାଳନ 

ବୀଣା ତାନେ ଦେବଯତି ମୋହୁଛନ୍ତି ମନ |

ଶମନ ନମନ କରୁଥାନ୍ତି ଯୋଡ଼ି କର 

ଖଟନ୍ତି ପୟରେ ସୁଧାକର ପ୍ରଭାକର |

କମଳା କୋମଳ ଅଙ୍କେ କରନ୍ତି ବିହାର 

ବାଣୀ ରାଣୀ ବୀଣାପାଣି ବଦନେ ଯାହାର |

ଅଷ୍ଟଶକ୍ତି ମହାବିଦ୍ୟା ଯା ପରିଚାରିଣୀ

ଅମର ଅମରୀ ମିଳି କରନ୍ତି ଦୟିନୀ |

ନାମ ଶୁଣୁ ଶୁଣୁ ଯାର ଟେକି ଦ୍ୟନ୍ତି ହସ୍ତ 

ଚରାଚର ବିଶ୍ୱ କୀଟୁ ବ୍ରହ୍ମ ପରିଯନ୍ତ |

ଅରୁଣ ଗରୁଡ଼ ଯହିଁ ନିତ୍ୟ ସେବାରତ 

କ୍ଷେତ୍ର ରକ୍ଷାକର୍ତ୍ତା ଲୋକନାଥ ହନୁମନ୍ତ |

ଯୋଗୀଗଣ ଧ୍ୟାନେ ଯା'କୁ କରନ୍ତି ଦର୍ଶନ 

ବେଦ ପୁରାଣ ଯା 'କୀର୍ତ୍ତି କରନ୍ତି ଗାୟନ |

ଅନନ୍ତ ମହିମା ସୁରାସୁରେ ଅଗୋଚର 

ଅନ୍ତ ପାଇ ନପାରନ୍ତି ହର ବେଦବର |

କଳ୍ପ କଳ୍ପ ଜଳ୍ପି ଋଷି ପାଇଲେନି ଅନ୍ତ 

ତଳ୍ପ ସାଜି ନପାଇଲେ ନାଗେଶ ଅନନ୍ତ |

ମାଳ ମାଳ ବିଶ୍ୱ ଯାର ଲୋମେ ପରକାଶ 

ପୟର ପାତାଳ ଶିର ଅସୀମ ଆକାଶ |

ବଡ଼ପଣେ ଉଡ଼ାଉଛି ପତିତପାବନ

ଚତୁର୍ଦ୍ଧା ମୂରତି ବିଜେ ରତ୍ନ ସିଂହାସନ |

ଚଉବର୍ଗ ଦାନୀ ମହାବାହୁ ବଳିୟାର 

ଖୋଲିଛି ମହାପ୍ରସାଦ ଆନନ୍ଦ ବଜାର |

ବିଚିତ୍ରକର୍ମାର ଏତ ବିଚିତ୍ର ଭବନ 

ଅନେକ ଆଶ୍ଚର୍ଯ୍ୟମାନ ହୁଅଇ ଲୋକନ |

ସୌମ୍ୟ ନରସିଂହ ରୂପ ପ୍ରଭୁ ଜଗନ୍ନାଥ 

ଶ୍ରୀପୟରେ ଜଗା କରେ କୋଟି ପ୍ରଣିପାତ |