ଆସିଲା ଶୀତ

ଆସିଲା ଶୀତ ବସିଲା ମିତ

ଆମ କୁନା ସାଥିରେ,

ଗାଇଲା ଗୀତ ପଢିଲା ପାଠ

ବସି କଅଁଳ ଖରାରେ ।

ଖାଇଲା ମୁଢି ପଖାଳ ବଢି

ଅତି ଆନନ୍ଦ ମନରେ,

ଶାଗ ଖରଡା ପୋଇ ରାଇତା

ଆହା କି ଖୁସି ମନରେ ।

ଶୋଇଲା ଯାଇ ନରମ ଶେଯେ

ପଶି କମଳ ଭିତରେ,

ଶୁଣିଲା ଜେଜେ ଗପ ପେଡିକୁ

ଖୋଜିଲା କାହାଣୀରେ ।।

ହୁଁ ମାରିଲା ହାଇ ମାରିଲା

ଗପ ଅଧା ରହିଲା,

ବାଉଳି ହେଲା ଘୁଙ୍ଗୁଡ଼ି ଦେଲା

ନିଦରେ ଘଡିକିଲା ।

ଜେଜେ ହସିଲେ ଥଟ୍ଟା କରିଲେ

କହିଲେ ବଗୁଲିଆ,

ରାତି ପାହିଲେ କହିବ ଗେହ୍ଲେ

ଅଧା ଗପ ଶୁଣିବା ।।

ଗରମ ଭାତ ଗରମ ତୁଣ

ଆହାକି ମଜା ହେବ,

ଖାଇବା ବେଳେ ଟାକରା ମାରି

ବଡ଼ ଖୁସି ହୋଇବ ।

ଗାଆଁ ପୋଖରୀ ଥଣ୍ଡା ପାଣିରେ

ସିନାନ କରିବ ଯାଇ,

ଆମ୍ବୁଲ ଆଉ ରସୁଣ ଦଳି

ବାସି ପଖାଳ ଖାଇ ।

ଗାଆଁ ଗୋହିରୀ ଭିତରେ ପଶି

ଦେଖିବ ମାଛଧରା,

ଗଡିଶା ଚେଙ୍ଗ ପଙ୍କ ଭିତରୁ

ଆଣିବ ବୋହି ପରା ।

ଚୁଲିରେ ପୋଡ଼ି ପିଆଜ ବଢି

ମାଆ ଛେଚିଣ ଦେବେ,

କଞ୍ଚାଲଙ୍କାକୁ ଜେଜେମା ପୁଣି

ଟିକେ ଚକୁଡି ଦେବେ ।

ଜେଜେ ଜେଜେମା ପାଖରେ ରହି

  କେତେ ମଜା କରିବ,

ଶୀତ ବି ମିତ ସାଥିରେ ରହି

  ମଜା ଉଠାଉ ଥିବ ।।