ପଲ୍ଲୀ ଗାଁ ଶୀତ କାର୍ତ୍ତିକ ବ୍ରତ
ପଲ୍ଲୀ ଗାଁ ଶୀତ କାର୍ତ୍ତିକ ବ୍ରତ
🐚 ପଲ୍ଲୀ ଗାଁ ଶୀତ କାର୍ତ୍ତିକ ବ୍ରତ🐚
ପଶ୍ଚିମ ଆକାଶେ ରବି ହୋଇଲେଣି ଅସ୍ତ,
ପକ୍ଷୀଗଣ ନୀଡକୁ ବାହୁଡିଲେଣି ହୋଇ ବ୍ଯସ୍ତ।
ଗାଁ ଦାଣ୍ତ ରୁ କ୍ଷେତକୁ ଲମ୍ବିଲାଣି ଧୂଳି, ଧୂଆଁ, କୁହୁଡ଼ି ର ଆସ୍ତରଣ,
ଉତ୍ତର ଦିଗରୁ ବହିଲାଣି ହେମାଳ ପବନ।
ତୁଳସୀ ଚଉଁରା ମୂଳେ ଭୂଆଶୁଣୀ ବୋହୂ ଜାଳିଲାଣି ସଂଜବତୀ,
ଭାଗବତ ଟୁଙ୍ଗି ରୁ ଶୁଭିଲାଣି ଶ୍ରୀମଦ୍ ଭାଗବତ ଗୀତି।
ପଲ୍ଲୀ ଗାଁ ର କାର୍ତ୍ତିକ ସନ୍ଧ୍ଯାରେ,
ମିଞ୍ଜି ମିଞ୍ଜି ହୋଇ ଜଳେ ବତୀ ଆକାଶ ଦୀପରେ।
ଜାଡ ପବନରେ ଭାସି ଆସେ ବାସ୍ନା ଶେଫାଳି ଫୁଲର,
ଗହୀର ବିଲରୁ ରହି ରହି ଶୁଭେ ହୁକେ- ହୁ-ର ସ୍ବର।
ରାତିର ଶିଶିର ହୁଏ ସକାଳେ କୁହୁଡି ପାଣି,
ସୂର୍ଯ୍ୟଙ୍କ କିରଣ ସ୍ପର୍ଶ ରେ ସାଜଇ ମୁକୁତା ମଣି।
ଅପରାହ୍ନ ଦରଫୁଟି କଢି, ସଂଜ ନଇଁଲେ ହୁଏ ରାତିର ରାଣୀ,
ରାତି ପାହିଲେ ଝଡି ପଡେ ଶେଫାଳି ଫୁଲ , ଶିଶିରାକ୍ତ ଘାସ ରେ ସତେକି ମୁରୁଜ ବୁଣି।
ନବ ତନୟା ମୁରୁଜ ଘେନି ବ୍ରୁନ୍ଦାବତୀ ମୂଳେ, ଆଙ୍କି ଦଏ ଚିତ୍ର ଭଳିକି ଭଳି,
ଚତୁର୍ଦ୍ଦିଗେ ଶୁଭୁଥାଏ ଘଣ୍ଟ-ଘଣ୍ଟା,ଶଙ୍ଖଧ୍ବନି,ହରିବୋଲ,ହୁଳହୁଳି।
ପଲ୍ଲୀ ଗାଁର ଶୀତ ସକାଳେ ନିତି ସଭିଏଁ କରନ୍ତି ନାମ ସଂକୀର୍ତ୍ତନ ପ୍ରଭାତ ଫେରି,
ଗାଁ ଦାଣ୍ତ ରେ ଗାଇ ଭଜନ, ଜଣାଣ,ଚମ୍ପୁ, ଝାଞ୍ଜ,କଂସାଳ, ମ୍ରୁଦଙ୍ଗ ଧରି।
କଦଳୀ ପଟୁଆ ଡଙ୍ଗା ରେ ପାନଗୁଆ ରଖି ଆ-କା-ମା-ଭୈ ଗୀତ ଗାଇ,
ସଫଳ କରନ୍ତି ପଲ୍ଲୀ ଗାଁ ଶୀତ କାର୍ତ୍ତିକ ବ୍ରତ ନଦୀ, ନାଳ, ପୋଖରୀରେ ଡଙ୍ଗା ବାହି।
🌼🌼🌼🌼🌼🌼🌼
ନାରାୟଣ ଚନ୍ଦ୍ର ନାୟକ
ଜାମସେଦପୁର
