ପିଲାଙ୍କ ପ୍ରଶ୍ନ

ପଚାରଇ ପ୍ରଶ୍ନ ନାତିଆ ନଟିଆ

କହିଲ ଦେଖିବା ଜେଜେ

ଷଣ୍ଢ ଗୁଡା କିଆଁ ବୁଲନ୍ତି ପଦାରେ

ବନ୍ଧା ନ ହୁଅନ୍ତି ପଘେ ।

ମନ ଇଚ୍ଛା ବୁଲି ଖାଆନ୍ତି ଫସଲ

ବେଧଡ଼କ ମାତବର

ବିଚରା ଗାଈଙ୍କୁ ବାନ୍ଧିକି ଖୁଣ୍ଟରେ

ଦୁହାଁଯାଏ ଚରଚର ।

ରାନ୍ଧି ପରଶୁଛି ଜେଜେମା ନିଇତି

ଗେଫି ଚିଲାଉଛ ପାଟି

ଷଣ୍ଢ ଆଉ ତୁମ ଭିତରେ ଫରକ

କଅଣ ବିଶେଷ ଅଛି ।

ଚଷମା ନଥିଲେ ଦିଶୁନି ତୁମକୁ

ଭଲକି ପାଠ ଅକ୍ଷର 

ବଙ୍କୁଲି ବାଡିକୁ ଉଞ୍ଚାଇ ହେଉଛ

ତମତମ ଗରଗର ।

ବୁଢା ଜେଜେବାପା ଭାରି କଅଁଳେଇ

କହିଲେ ରେ ନଟବର

ଭାରି ବଦମାସ ହେଲୁଣି ଏବେ ତ

ମୁଣ୍ଡ ମୋ ବାତ ଚକ୍କର ।

ଆଉ ବେଶୀ ପ୍ରଶ୍ନ ପଚାରନା ମୋତେ

ଦଉଡି ବେଗେ ତୁ ଯାଆ

ଜେଜେମା ତୋହର କରିଥିବ ଚାହା

ନେଇ ଆସ କପେ ଚାହା ।

ଜାଣିଲା ନଟିଆ ଜେଜେ ବୁଢା ମନ

ମାରିଲାଣି ପାଣିଚିଆ 

ଚାହା କପେ ଆଣି ଦେଲା ସେ ଧରାଇ

କହିଲା ଜେଜେ ପିଉଥା ।

ମୋ ବହି ବସ୍ତାନି ରଖିବୁ ସଜାଡି

ଚୋବାଇବୁ ଖିଲିପାନ 

ଖେଳିବୁ ମିଶିକି ଆମେ ସାଙ୍ଗ ସାଥି

ହେଉଛି ମୋତେ ବିଳମ୍ବ ।