Library
Profile
ଫର ଫର ହୋଇ ତ୍ରିରଙ୍ଗା ଉଡେ
ଫର ଫର ହୋଇ ତ୍ରିରଙ୍ଗା ଉଡେ
ଫର ଫର ହୋଇ ତ୍ରିରଙ୍ଗା ଉଡେ ।
ଶହୀଦ ସ୍ମୃତିରେ ପ୍ରଣତି ବାଢେ ।୧।
ତିନିଟି ରଙ୍ଗରେ ସଜେଇ ହୋଇ ।
ଗଗନେ ଉଡୁଛି ଆନନ୍ଦ ହୋଇ ।୨।
କେଶରୀ ଧବଳ ସବୁଜ ରଙ୍ଗ ।
ଏଇ ତିନି ରଙ୍ଗେ ତ୍ରିରଙ୍ଗା ରଙ୍ଗ ।୩।
ସାହସ ବୀରତା କେଶରୀ ରଙ୍ଗ ।
ସତ୍ଯ ଶାନ୍ତି ଗାଏ ଧବଳ ରଙ୍ଗ ।୪।
ଭ୍ରାତୃତ୍ବ ଭାବ ତା ସବୁଜ ରଙ୍ଗ ।
ଅଶୋକ ଚକ୍ର ପ୍ରଗତିର ମଙ୍ଗ ।୫।
ବଳିଦାନ କେତେ ସଂଗ୍ରାମୀ ଦେଲେ ।
ଆମ ଏ ତ୍ରିରଙ୍ଗା ମାନ ରଖିଲେ ।୬।
ବକ୍ସି ଜଗବନ୍ଧୁ ସୁରେନ୍ଦ୍ର ସାଏ ।
ବାଘାଯତୀନଙ୍କ ଗୁଣ ଏ ଗାଏ ।୭।
ଲକ୍ଷ୍ମଣ ନାୟକ ଶହୀଦ ଗାଥା ।
ଜୟୀ ରାଜଗୁରୁ ଗୁଣ ସର୍ବଥା ।୮।
ରଘୁ ଦିବାକର ନେତାଜୀ ଗୁଣ ।
ଦୋରା ବିଶୋଇଙ୍କ ବୀରତ୍ବ ପଣ ।୯।
ଦଳବେହେରା ଓ ବାଜିରାଉତ ।
ଦେଶ ପାଇଁ ହେଲେ ଶହୀଦ ସେ ତ ।୧୦।
ତାଙ୍କରି ରକତେ ଭାରତ ଭୂଇଁ ।
ରଞ୍ଜିତ ହେଲା ଏ ଦେଶ ଜାଣଇ ।୧୧।
ଆମରି ଦେଶର ଗୌରବ ଗାଥା ।
ଗାଉଛି ତ୍ରିରଙ୍ଗା ଟେକି ତା ମଥା ।୧୨।
ସକଳ ପ୍ରାଣରେ ଏକତା ମନ୍ତ୍ର ।
ଅହରହ ଦିଏ ଏହି ତା ତନ୍ତ୍ର ।୧୩।
ସ୍ଵାଧୀନ ଭାରତ ଗରବ ଇଏ ।
ଶହୀଦ ସ୍ମୃତିରେ ପ୍ରଣତି ଦିଏ ।୧୪।
ତ୍ରିରଙ୍ଗା ଗର୍ବ ଗୌରବ ଆମର ।
ରଖିବା ତା ଟେକ ସମ୍ମାନ ତାର ।୧୫।
