ଫେରି ଆସ......

ଜିତିବାକୁ ଚେଷ୍ଟା କରି

   ସବୁ କିଛି ହରେଇ ସାରିବା ପରେ

ଏବେ ହାରି ଯିବାକୁ ଚାହେଁ

ବାକି ଥିବା କିଛି ପାଇବା ଆଶାରେ

ତୁମ ମୋ ଭିତରେ ସମ୍ପର୍କ ର ସେତୁ ଟି

କାଁ ଭାଁ କେଉଁଠି

ଦବିଯାଇଛି ଅବା ଫାଟ ସୃଷ୍ଟି ହୋଇଛି

କିନ୍ତୁ, ଭାଙ୍ଗି ତ ଯାଇନି ନା

ସଜାଡି ଦେବାକୁ ହେବ

ମାଟିର ଲେପ ଦେଇ

ନତୁବା

   ଦୁଇ ମୁଠା ଶକ୍ତ ଆସ୍ତରଣ ର ନିବିଡ ବନ୍ଧନ ରେ

ବିଶ୍ୱାସ ଅଛି ଭରଷା ବି ଅଛି

   ଆଶା ବି ଅଛି କାମନା ବି ଅଛି

  କିନ୍ତୁ ଆବିଳତା ନାହିଁ କି ଆତୁରତା ନାହିଁ

ଅଛି କେବଳ

   ମମତାର ଶୀତଳ ପରଶ

ସ୍ନେହର ବାସ ଟିକକ

ସାଇତା ଫରୁଆରେ

  ହାର ଜିତ ର ପଶାପାଲି ରେ

ଗୋଟି ଚଳେଇ

   ଡାକରା ଦେବାଟା

ଖେଳୁଆଡ଼ ମନଭାବ ର ନିଶ୍ଚିତ ଏକ ସ୍ୱରୂପ

   ଦେଖୁଥିବା ଲୋକଙ୍କର ଗୁଂଜରଣ

   ଦ୍ବିଗୁଣିତ କରିଥାଏ

        ସେଇ ଆନନ୍ଦ ର ଚଉହଦିକୁ

ଅନୁଶୋଚନା ନଥାଏ

ହାରିବାରେ କି ଜିତିବାରେ

  କିନ୍ତୁ କେବଳ ଅନୁଶୋଚନା

       ହରେଇ ଦେବାରେ

ଏବେ ତ ସମୟ ଅପରାହ୍ନ

     ଥରୁଟିଏ ଫେରି ଦେଖ ପଛକୁ

          ଫେରି ଆସ

ଏକ ନୂଆ ସମ୍ଭାବନା ରେ ।