ପଚାରିଲେ ପାଖ ଲୋକେ

କାଳିଆ ସାଆନ୍ତେ ଅନେଇଲେ ମୋତେ

ଆଗରୁ ଚିହ୍ନିଲା ଭଳି

ସିଧା କରି ତେଣୁ ଚାହିଁ ପାରିଲିନି

ଲାଜରେ ମୁଁ ଗଲି ଜଳି ।

ତୁଚ୍ଛାକୁ ତ ସିଏ ଭାରି ରସିକ ଗୋ

ଆଗରୁ ଜାଣିଛି ମୁହିଁ,

ସେଥିପାଇଁ ଟିକେ ଆଢୁଆଳେ ଥାଇ

ଦେଲି ଶ୍ରୀ-ମୁଖକୁ ଚାହିଁ ।

ମୋତେ ଦେଖିଦେଇ ମୁରୁକି ହସିଲେ

ଠାରିଦେଲେ ବୋଧେ ଟିକେ,

"କେତେ ଦିନୁ ୟାଙ୍କ ଭାବରେ ପଡ଼ିଛ"

ପଚାରିଲେ ପାଖ ଲୋକେ ।

"ବାଳୁତ କାଳରୁ" କହିଦେଇ ତାଙ୍କୁ

ଜିହ୍ଵାକୁ କାମୁଡ଼ି ଦେଲି,

ଲକ୍ଷ୍ମୀ ଠାକୁରାଣୀ ଶୁଣିନେବେ କାଳେ

ମନେ ମନେ ଭାଳି ହେଲି ।

ଆଗରୁ ତ ସିଏ ରୋଷ କରିଛନ୍ତି

ଏ କଥା ଶୁଣିବେ ଯଦି,

ଜଗନ୍ନାଥଙ୍କର ଉପରେ ଆରୋପ

ଅକାରଣେ ଦେବେ ଲଦି ।

ବାକି କଥା ତାଙ୍କୁ ଜଣାଇବି ସବୁ

ନୀଳାଦ୍ରି ବିଜୟ ପରେ,

ଅନ୍ତର ମଧ୍ୟରେ ଭାଳି କରି ଏହା

ବାହୁଡ଼ି ଆସିଲି ଘରେ ।