ପାଦ ଦେଉ ଦେଉ

ପାଦ ଦେଉ ଦେଉ ବଡ ଦାଣ୍ଡେ ତାର

    ଦେଖି ଶ୍ରୀ ମନ୍ଦିରେ ନେତ

ବଡ ଦାଣ୍ଡ ଧୂଳି   ମୁଣ୍ଡରେ ତୁ ମାରି 

      ସୁମରିବୁ ଜଗନ୍ନାଥ

   ସେତ, ଅନାଥର ଅଟେ ନାଥ ।

ପହଁଚିବୁ ଯାଇ      ଅରୁଣ ସ୍ତମ୍ଭଠି

    ଲଭିବୁ ତାର ଆଶିଷ

ବାଇଶି ପାହାଚ   ଧୂଳି ମୁଣ୍ଡେ ମାରି

    ଦେଖିବୁ ବଟ ଗଣେଶ

ବେଢାରେ ବୁଲିବୁ   ମନ୍ଦିରେ ପଶିବୁ

ଗରୁଡ଼ ପଛରେ     ଦର୍ଶନ କରିବୁ

     ମନ ହୋଇଯିବ ପ୍ରିତ ।

ତା ପରେ କରିବୁ    କମଳା ଦର୍ଶନ

     ବିମଳା ଦର୍ଶନ ସାରି

ଆନନ୍ଦ ବଜାରେ  ଛପନ ଭୋଗରେ

     ଦେଖି ମନ ଯିବ ପୁରି

ଭୁଞ୍ଜିବୁ ଅବଢ଼ା   ହୁଏ ନି ଯା ବଢ଼ା 

ମାଖନ ମିଶିରି   ମାଲପୁଆ ପେଡା

     ଶାନ୍ତି ହୋଇଯିବ ଚିତ୍ତ ।