ଓଁ ନମଃ ଭଗବତେ ବାସୁଦେବାୟ

ମଙ୍ଗଳା ଚରଣ

.......................

"କ" ଠାରୁ "କ୍ଷ "

ପ, ଫ, ବ, ଭ, ମ

(ପ )

ପୂର୍ଣ୍ଣତାରେ ଯାହା ପ୍ରାପ୍ତ  ତାହା ଅପୂର୍ଣ୍ଣ ଅତୃପ୍ତ

ବୁଝିବା ବେଳକୁ ଚାଲିଯାଏ ଯୌବନ l

ପୁତ୍ର ଦୁହିତା ଘରଣୀ   ସଭିଙ୍କୁ ଆପଣା ମଣି

ବୃଦ୍ଧାବସ୍ଥାରେ ହୁଅଇ ସେ ଅବତୀର୍ଣ୍ଣ l

ପାଥେୟ କରି ଆଶାବାଡ଼ି

ପୂର୍ବଭାଗ୍ୟ ଥିଲେ ପ୍ରଭୁ ନାମକୁ ପଢ଼ି l21l

(ଫ )

ଫନ୍ଦାକରି ହରିନାମ  କରେନାହିଁ ଉଚ୍ଚାରଣ

କାଳବଳେ ପଞ୍ଚମହାଭୂତ ରେ ମିଶେ l

ଫଳରେ ଆଶା ରଖିଣ  ପ୍ରାଣ ହୁଅଇ ଦହନ

ପରକାଳ ସୁକୃତ ରାଶିକୁ ବିନାଶେ l

ଫଳାଫଳ ସର୍ବ ତୁମର

ଫଳଦାତା ଶ୍ରୀକୃଷ୍ଣ ପାଦେ ନମସ୍କାର l22l

(ବ )

ବନ୍ଦଇ ନନ୍ଦ ନନ୍ଦନ  ଗୋପୀକା ହୃଦ ଚନ୍ଦନ

ହେ ମାଧବ ମଦନ ମୋହନ ଗୋବିନ୍ଦ l

ବୁଦ୍ଧି ଜ୍ଞାନ ନାହିଁ ମୋର  ବାତୁଳ ବୋଲିବେ ନର

ବେଦ ପ୍ରଭେଦ ଜ୍ଞାନରେ ନାହିଁ ମୋ ଭେଦ l

ବିଜ୍ଞ ନୁହେଁ ନୁହେଁ ବିଜ୍ଞାନୀ

ବୁଦ୍ଧେ ଅନୁସରି କରେ ଧରେ ଲେଖନୀ l23l

(ଭ )

ଭାରତର ଜ୍ଞାନ ସୁଧା  ଧବଳୀ କରି ବସୁଧା

ବ୍ରହ୍ମାଣ୍ଡ ଭାଣ୍ଡରେ ପୂଣ୍ୟ ପରିପୂରିତ l

ଭାରତ ବର୍ଷ ଭ୍ରମଣ  କରି ବାହ୍ୟ ଜ୍ଞାନୀ ଗଣ

ପାଶ୍ଚାତ୍ୟ ଦେଶରେ କଲେ ପରିବାହିତ l

ଭାବ ଜ୍ଞାନ ବୁଦ୍ଧିର ଗାଥା

ଭ୍ରମ ଭାରତୀୟ ଆଜି ଆଶ୍ଚର୍ଯ୍ୟ କଥା l24l

(ମ )

ମର କଳେବର ଧରି  ଅମର ଯହିଁ ବିହରି

ମର୍ତ୍ତ୍ୟପୁରେ ମହାଜନ ପଥ ଦେଖାଇ l

ମଙ୍ଗଳ ପବିତ୍ର ଗୀତ  ହୋଇଛି ଯହିଁ ନିଃସୃତ

ମହିମା ଅନନ୍ତ କଳି ନପାରେ କେହି l

ମହତ ବିସ୍ତୃତ ବିଚାର

ମହାନ ସଂସ୍କୃତି ଶାଳୀନତା ଆଚାର l25l