ମନେପଡ଼େ
ମନେପଡ଼େ
ଆଜିବି ତ' ମନେପଡ଼େ
ସେ ଦିନର କଥା
ଶ୍ରାବଣର ମୁହଁ ସଞ୍ଜବେଳେ ,
ଆକାଶରୁ ଟୋପା ଟୋପା
ଝରୁଥିଲା ବର୍ଷା
ଚାଲୁଥିଲେ ଗୋଟେ ଛତାତଳେ ।
କୁମ୍ଭାଟୁଆ ଗାଉଥିଲା ଗୀତ
ତୋଳୁଥିଲା ବେସୁରା ରାଗିଣୀ ,
ଶୁଭୁଥିଲା ଝିଙ୍କାରୀର
ମଧୁର ମୂର୍ଚ୍ଛନା
ମନ ମୋର ନେଉଥିଲା କିଣି ।
ଅନ୍ଧାରର ଛାତି ଚିରି
ବିଜୁଳି ଆଲୁଅ
ଚାଲିଯାଏ ଦେଖାଇ'କି ପଥ ,
ଚାରିଆଡ଼େ ନୀରବତା
ଯାଇଥିଲା ଛାଇ
ଚାଲୁଥିଲ କରି ମଥାନତ ।
କାହିଁ ତୁମେ କେତେଦୂରେ
ହେ'ମୋ ପ୍ରିୟସାଥୀ
ଆମ ମଧ୍ୟେ ଅନେକ ଦୂରତା ,
କିଏ ଜାଣେ ଭାଙ୍ଗିଦେବ
ନିଷ୍ଠୁର ସମୟ
ଆମ ମଧ୍ୟେ ଯେତେ ନିବିଡ଼ତା ।