ଓଡ଼ିଆ ମାଟିର ଲଢୁଆ ବୀର

କଳକଳ କୂଳ ଉଚ୍ଛଳ ତରଙ୍ଗ 

     ଉତ୍କର୍ଷ ଉତ୍କଳ ଉଡ୍ର କଳିଙ୍ଗ

 ଅନୁପମ ଭୂଇଁ ଓଡ଼ିଶା ଭୂଖଣ୍ଡ 

     ଶାସ୍ତ୍ରୀୟ ଓଡ଼ିଆ ଧ୍ୱନି ତରଙ୍ଗ ।

ଗିରିଗୁହା ଦେହେ କୋଣ ଅନୁକୋଣେ 

      ଭରି ରହିଅଛି କୀରତିରାଜି

ସଞ୍ଚରୁଛି ପ୍ରାଣ କାଷ୍ଠ ଓ ପ୍ରସ୍ତର

     ଗାଥା ଐତିହ୍ୟକୁ ବଖାଣେ ଆଜି ।

ଜାଭା ବାଲି ମାଳ ସିଂହଳ ଦ୍ୱୀପରେ

     ଶ୍ୟାମ କମ୍ବୋଡିଆ ଚାଇନା ଦେଶେ

ଦେଶ ବିଦେଶରେ ଉଡେ ବୈଜୟନ୍ତୀ

     ଧର୍ମ ହେଉ ଶିକ୍ଷା ସ°ସ୍କୃତି କ୍ଷେତ୍ରେ ।

ସବୁଜ ବନାନୀ ଜୈବ ବିବିଧତା

      ସଞ୍ଚରେ ଜୀବନ ରାଗ ମୂର୍ଚ୍ଛନା

ଶସ୍ୟ ଶ୍ୟାମଳା ଅନନ୍ୟା ଓଡ଼ିଶା

      ପ୍ରାକୃତିକ ଦୃଶ୍ୟ ସୁମନୋହରା ।

ବୈତରଣୀ ପ୍ଲୁତା ବରାହ ବିରଜା

       ଯଜ୍ଞ ଭୂମଣ୍ଡଳ ବେଦ ଓ ବିପ୍ର

ଧାମ ନୀଳାଚଳ ଶ୍ରୀ ପୁରୁଷୋତ୍ତମ

       ଏକାମ୍ର ଅର୍କାଦି କ୍ଷେତ୍ର ପବିତ୍ର ।

ଗାଏ ମହୋଦଧି ସ୍ରୋତ ନଦନଦୀ

       ଗିରି କନ୍ଦରର ଝର ନିର୍ଝର

ଓଡ଼ିଶା ମାଟିର ନାହିଁ ପଟାନ୍ତର

       ଧନ୍ୟ ସାହସିକ ପାଇକ ବୀର ।

ଢାଳି ଦେଇଅଛି ବକ୍ଷର ଶୋଣିତ

       ସମ୍ମୁଖ ସମରେ ସାକ୍ଷାତ ସିଂହ

ଜାଣିନାହିଁ ପଛ ଘୂଞ୍ଚା ତା ଜାତକେ

       ଯୁଦ୍ଧ ପାରଙ୍ଗମ ଓଡ଼ିଆ ପୁଅ ।

ସହିଛି ଯାତନା ଦୁର୍ବିପାକ ବାତ୍ୟା

       ବନ୍ୟା ମରୁଡିର ଭୀଷଣ ଦାଉ

ଟେକି ରହିଅଛି ସଗର୍ବେ ତା ମଥା

       କାଳବକ୍ଷେ କୀର୍ତ୍ତି ରଚି ସୁବାହୁ ।

ରହିଛି ରହିବ ସୁବର୍ଣ୍ଣ ଅକ୍ଷରେ

        ଅକ୍ଷୟ ଅମର ନାମ ତାହାର

ଯଶସ୍ୱୀ ଓଡ଼ିଆ ବୀର ଦେଶପ୍ରେମୀ

       ଧନ୍ୟ ଓଡ଼ିଶାର ଲଢୁଆ ବୀର ।