ଜୀବନ ପୁସ୍ତିକା

ଜୀବନ ପୁସ୍ତିକା ପଢୁଥିଲି ଏକା

  ବୁଝିଗଲି ମୁଁ କିଛି କିଛି

ଯାହା ବି ରହିଲା ଅବୁଝା ଅଭୁଲା

 ବସି ମନେ ମନେ ଭାବୁଛି ll

କେଉଁଠି ଝୁଣ୍ଟିଛି କେଉଁଠି ବସିଛି

  ତାଲିକା ପ୍ରସ୍ତୁତ କରିଛି

ଏତିକି ଭାବିଲି ଏକା ହୋଇଗଲି

  ସବୁଠୁ ପଛରେ ରହିଛି ll

ସମୟ ନିର୍ଦେଶ ଦେଇ କହିଗଲା 

 ପଛ କଥା କାହିଁ ଭାବୁଛି

ଯାହା ଛାଡିଗଲୁ ଭୁଲିଯାଅ ତାକୁ 

  ସବୁ ତ ସାଉଁଟି ଧରିଛି ll

ଯାତ୍ରାର ଅନ୍ତିମ ପାଦ ଥାପିଦେଲେ

 ଗଣ୍ଠିଲିକୁ ଖୋଲି ଦେଉଛି

ହରଣ ଗୁଣନ ମିଶାଣ ଫେଡ଼ାଣ

  ହିସାବ ପରଖି ନେଉଛି ll

ଯୁକ୍ତରେ ରହିଲେ ଦିଅଇ ସମ୍ମାନ

 ବିଯୁକ୍ତରେ ଦଣ୍ଡ ଦେଉଛି 

ଭୁଲ ଓ ଠିକର ବିଚାର କରିବ 

 ସବୁ ଲୀଳାମୟ ଦେଖୁଛି ll