గ్రంథాలయం
ప్రొఫైల్
ଭିଟାମାଟି
ଭିଟାମାଟି
1 min
252
ଯେଉଁ ଘରେ ମୁଁ ଯେ ଜନମ ନେଇଛି
ଜଳିଛି ମୋ ଷଠୀନିଆଁ
ସେହି ଘର ମୋର ଅତି ଆପଣାର
ଝାଟିମାଟି ମୋର ଗାଆଁ ll
ସ୍ନେହ ଶରଧାର ମୂଳଦୁଆ ତାର
ବିଶ୍ୱାସର ମଝି ଖୁଣ୍ଟି
ଶାନ୍ତି ମୈତ୍ରୀ ପ୍ରୀତି ସଦା ବିରାଜିତ
ପ୍ରେମ ରହିଥାଏ ବାଣ୍ଟି ll
ଛଣ ଛପରରେ ମାଟି କାଦୁଅରେ
ଗଢ଼ା ମୋର ଭିଟାମାଟି
ତା କୋଳରେ ଯିଏ ଶୋଇଛି ଥରୁଟେ
ପାଇଛି ଜୀବନେ ଶାନ୍ତି ll
କୁନିକୁନି ପାଦେ ଚାଲିବା ଶିଖିଛି
ପଡିଛି ଉଠିଛି ଯେତେ
ତୋଳି ଧରିନେଇ କୋଳରେ ବସାଏ
ଆନନ୍ଦ ଦେଇଛି କେତେ ll
ବାପା କକା ଭାଇ ହରଷେ ରୁହନ୍ତି
ସଭିଏଁ ମୋ ଆପଣାର
ଜେଜେ ଜେଜେମାଙ୍କ ନୟନ ପିତୁଳା
କୋଳ ତାଙ୍କ ସ୍ୱର୍ଗ ପୁର ll
ବିପଦେ ଆପଦେ ଏକତା ଯେ ଶକ୍ତି
ଆସୁ ଯେତେ ଭୟଙ୍କର
ଟିକେ ନଇଁ ଗଲେ ସବୁ ଟଳିଯାଏ
ହାରି ଯାଏ ବହୁଦୂର ll
ଭିଟାମାଟି ମୋହ ଛାଡି ପାରିନି କେ
ଜନ୍ମରୁ ମରଣ ଯାଏଁ
ଦିନେ ନା ଦିନେ ସେ ବାହୁଡ଼ି ଆସିଛି
ବାନ୍ଧି ପାରିନାହିଁ କିଏ ll
