ପ୍ରଭୁ ଶ୍ରୀଭେଙ୍କଟେଶ୍ୱର

ଦ୍ୱାପରରେ ହରି କୃଷ୍ଣ ଅବତାରେ

ଦେବକୀ ଗର୍ଭେ ସମ୍ଭୂତ l

ଦେବ ମାୟା ବଳେ ଗୋପପୁର ଗଲେ

ପାଳିଲେ ଯଶୋଦା ମାତ ll

ବାତ୍ସଲ୍ୟ ଡୋରୀରେ ବାନ୍ଧିଥିଲେ ମାତା

ଖୁଆଇ ସର ଲବଣୀ ll

ଗେହ୍ଲେଇ ଡାକନ୍ତି କଳାକାହ୍ନୁ ମୋର

ଦୁଃଖିଧନ ନୀଳମଣି l

କୃଷ୍ଣ ଅବତାର କଂସର ସଂହାର 

ଧରଣୀ ଭାରା ଉଶ୍ୱାସ l

ତେଜି ଗୋପପୁର ବାର ବର୍ଷେ ଗଲେ

ମଥୁରା ଜଗନ୍ନିବାସ ll

କଂସ ବଧ କରି ମଥୁରା ନବରେ

ଉଗ୍ରସେନ କଲେ ରାଜା l

କଂସାରୀ ମୁରାରୀ ମଧୁକୈଟଭାରୀ 

ଜଗତେ ଉଡ଼ଇ ଧ୍ଵଜା ll

ଜରାସନ୍ଧ ଡରି ପ୍ରଭୁ ଦଇତାରୀ 

ତେଜିଲେ ମଥୁରା ଭୂଇଁ l

ସାଗର ବେଷ୍ଟିତ ଦ୍ୱାରକା ପୁରୀରେ

ରହିଲେ ଗଡ଼ ଗଢ଼ାଇ ll

ଷୋଳ ଶସ୍ର ନାରୀ ଐଶ୍ୱର୍ଯ୍ୟ ନଗରୀ

ସେବା ଅଷ୍ଟ ପାଟବଂଶୀ l

ଗୋକୁଳେ ଆକୁଳେ ଝୁରନ୍ତି ଯଶୋଦା

ବାଜୁନି କହ୍ନାଇ ବଂଶୀ ll

ଏକଦିନେ ମାତା ବାଟ ଖୋଜି ହେଲେ

ଦ୍ୱାରକାରେ ପରବେଶ l

କାହ୍ନାଇକୁ ଡାକି କହନ୍ତି ବାବୁରେ

ମନ ହେଉନାହିଁ ତୋଷ ll

ଦେଖିନାହିଁ ମୁହିଁ ଶୁଣିଛି କେବଳ ତୋର

ବିବାହ କାହାଣୀ l

ମହା ଧୁମ ଧାମେ ବିଭା ହୋଇଥିଲୁ

ସତ୍ୟଭାମା ରୁକମଣୀ ll 

ଏ ବୃଦ୍ଧ ବୟସେ ବାବୁରେ କାହିଁକି 

ବଳୁଛି ମୋହର ମନ l

ଦେଖା ଟିକେ ତୋର ସେ ବିବାହ ଲୀଳା

ବଞ୍ଚିବି ମୁଁ କେତେ ଦିନ ll

ଆଡ଼ମ୍ବରେ ପ୍ରଭୁ ଆୟୋଜନ କଲେ 

ବିବାହେ ତୋଷ ଜନନୀ l

ପ୍ରଭୁ ହେଲେ ବର ଶ୍ରୀନିବାସ ପୁଣି 

କନ୍ୟା ପଦ୍ମାବତୀ ରାଣୀ ll

ବିବାହ ଖରଚ ପାଇଁ ପ୍ରଭୁ କଲେ 

କୁବେରଙ୍କ ଠାରୁ ଋଣ l

ପ୍ରଭୁଙ୍କ ସେ ଋଣ କଳିଯୁଗେ ଭାଈ 

ସୁଝିବେ ଭକତ ଗଣ ll

ଭେଙ୍କଟାଦ୍ରି ବାସ ପ୍ରଭୁ ଭେଙ୍କଟେଶ 

ସପ୍ତଗିରି ତିରୁପତି l

କଳି ଯୁଗେ ସ୍ୱୟଂ ବିଷ୍ଣୁ ବିଜେ ତହିଁ 

ସଙ୍ଗେ ଲକ୍ଷ୍ମୀ ପଦ୍ମାବତୀ ll

କଳିଯୁଗ ଶେଷେ ପ୍ରଭୁ ହେବେ କଳ୍କୀ 

ଧୂମକେତୁ ଅବତାର l

ଦୁଷ୍ଟଙ୍କୁ ସଂହାରି ତିରୁପତି ତେଜି 

ଯିବେ ବଇକୁଣ୍ଠ ପୁର ll

କେତେ କେତେ ଭକ୍ତ ଛୁଟି ଆସୁଛନ୍ତି 

ପ୍ରଭୁଙ୍କ ଦର୍ଶନ ପାଇଁ l

ତାଙ୍କ ଶ୍ରୀଚରଣେ ଶରଣ ମୋହର 

ନେତ୍ରେ ଥାନ୍ତୁ ପ୍ରଭୁ ରହି ll