ଆଚାରେ ଲକ୍ଷ୍ମୀ

ଆଚାରେ ଲକ୍ଷ୍ମୀ ବିଚାରେ ପଣ୍ଡିତ

ଜନ ମୁଖୁ ଶୁଣାଯାଏ

ଏହି ସତ୍ୟବାଣୀ ମାନବ ସମାଜେ

କେବେ ବି ଅନ୍ୟଥା ନୁହେଁ ।

ଶୁଦ୍ଧତା ଜଳରେ ଅନ୍ତର ବାହାର 

ନିତି କଲେ ବିଶୋଧିତ

ଆଚରଣ ହୁଏ ଆପେଆପେ ଶୁଦ୍ଧ 

ଲକ୍ଷ୍ମୀ ହୋନ୍ତି ବିରାଜିତ ।

ଅନାଚାର ଆଉ କୁଭାବନା ରଖି

ବାଟ ଚାଲୁଥାଏ ଯିଏ

ଜୀବନରେ କେବେ ସଫଳତା ଶିଢି଼

ଚଢ଼ି ନ ପାରଇ ସିଏ ।

ମାଦକ ନିଶାରୁ ଅଶୁଦ୍ଧି କର୍ମରୁ 

ଧନଲକ୍ଷ୍ମୀ ଆସି ଫେରେ

ଧରି ରଖିବାର ଅପଚେଷ୍ଟା କଲେ

ଭରସି ରହି ନ ପାରେ ।

ଜ୍ଞନୀ ସୁପଣ୍ଡିତ ପବିତ୍ର ବିଚାରେ

ଯେମିତି ଭରନ୍ତି ଖୁସି

ଲକ୍ଷ୍ମୀବନ୍ତଟିଏ ସୁଗୁଣେ ଲକ୍ଷ୍ମୀଙ୍କୁ

ସେମିତି ଆଣେ ଆକର୍ଷି ।

ଲକ୍ଷ୍ମୀ ପୁରାଣରେ ଏ ଆଚାର ଗାଥା

ଯେତେ ହୋଇଛି ବର୍ଣ୍ଣିତ

ସଂସାର କ୍ଷେତରେ ସେ ମଞ୍ଜି ବୁଣିଲେ

ଜୀବନେ ନିଶ୍ଚେ ବିଜିତ ।